黃牛飛炒到1千

23場陳奕迅演唱會門票於昨晨10時開售，吸引大批人排隊撲飛，半日火速售罄！其中一個售票地點即尖沙咀金馬倫道通利琴行，早已有十多位南亞裔「排隊黨」，排頭位的南亞裔男士向記者大騷手上門票，還表示早上8時已開始排隊，直言會將門票轉售。而荃灣區同樣有「黃牛黨」出現，有兩位婆婆幫手排隊掃飛，排完再排，每次掃10張。至於網上炒飛潮同樣嚴重！至昨晚7時為止，已有多位「黃牛黨」在網上公然轉售Eason個唱門票，當中以380元的門票「銷情」最佳，更有「黃牛黨」賣家開價500元及700元出售指定日子的門票，又指明可連位發售，而680元的「貴飛」更以1,000元炒高出售，不過經議價後，即「減價」以950元成交。

主辦單位指為避免黃牛飛情況，先後作出三個安排，但對於仍有「黃牛黨」出現，發言人說︰「包括信用卡優先訂票，其次係內部認購，最後係公開發售。做咁多嘢都係想Fans買到飛，舒服睇偶像，作為主辦單位，要做嘅做晒，其他嘢控制唔到。」