Super Girls「舞」辛苦

「舞功」高強的Super Girls不僅跳舞犀利，更擁有女仔見到都流晒口水的長腿，不過台上一分鐘，台下十年功，五女為了完美演出，捱更抵夜練舞已是家常便飯，更弄得滿身損傷，背後的辛酸血淚真是有苦自知！

女子組合Super Girls在現今跳唱組合中獨當一面，自小習舞的Aka和Cheronna的「舞功」固然厲害，不過入行後才學舞的Jessica和Yanny亦下了不少苦功，Jessica說：「因為我哋連最基本嘅底子都冇，最簡單嘅Move都唔識，初初入行真係由朝跳到晚。」Yanny更經常跳到喊：「畀好大壓力自己，唔係話唔想輸，但唔想畀人覺得大家都係組合，點解你哋會比下去。試過出場前望住盞燈，心諗你可唔可以跌落嚟隊冧我！」

五女為了跳舞吃了不少苦頭，更跳到五勞七傷，Cheronna因為太用力「Chok」親腰骨，現時還未痊愈：「因為我整到坐骨神經，依家瞓覺都會腳痹，要睇針灸，有時真係痛到瞓唔到覺，所以大家記得熱身！」Heidi亦試過跳到一雙「地圖腳」：「之前我哋有首歌係要跪落地下跳，點知太用力，一撞落地對腳瘀咗幾撻，一撻撻紫紅色好似地圖咁！」Aka笑說：「所以遮瑕膏好重要，每次出場前我哋搽完面就要搽腳！」

高踭達人

每次見到五女着5吋高踭鞋跳舞都看得人膽戰心驚，Aka曾在表演時仆在台上兼翻滾一圈，她笑言瘀事一籮籮：「排舞老師都有話過我重心唔知點解成日向後，加上我哋平時練習係着平底鞋，一轉高踭鞋個重心好唔穩。其實如果個踭係好幼，個重心就要向前少少，如果唔係個踭會好搖。」已成「高踭達人」的Heidi就教路：「跳舞前要留意個地下，木地板同地氈都好唔同，如果驚跣就黐膠紙喺鞋底！」蝦碌經驗豐富的Aka亦甚有心得：「或者可以整啲松香粉喺鞋底，個摩擦力會高啲。」