Niki咀天華要包膠 約法三章 免錫胳肋

周麗淇前晚慶功時兌現承諾咀天華，卻出蠱惑用保鮮紙製造隔膜變成「膠咀」，她藉詞禽流感肆虐，笑言還是衞生一點比較好。

藝人周麗淇（Niki）承諾若然劇集《女警愛作戰》最高收視逾32點便會咀天華，彌補劇中沒有咀戲，而劇集最終錄得最高34點收視。前晚天華、Niki、朱璇、呂慧儀和王君馨等為劇集慶功，Niki兌現承諾與天華咀嘴，但卻搞笑地用保鮮紙包住他的嘴，兼用手遮住他的臉，才輕輕錫下去，天華不禁扯開保鮮紙投訴：「你都遮晒我塊面，點睇到我個樣！」Niki隨後再咀天華，問他有甚麼感覺？天華笑說：「好膠囉！」Niki反駁：「禽流感呀！衞生啲好。」

笑言原意咀腳趾

Niki表示事前曾致電天華，表明只可以咀面部五官：「最初唔記得講明咀邊度，點知佢會唔會叫我咀啲唔見得光嘅地方，萬一變態到整蠱我，叫我咀佢胳肋底或者下半身，有毛點咀呀！」天華則笑說：「本來諗住除咗對鞋叫佢錫腳趾，但佢想咀我好耐，依家完成咗佢心願啦！」另外，Niki透露年底會推出首張國語唱片，自言普通話尚算合格，但第一次出國語碟心情難免緊張。