Bosco打大蠔客主意

黃宗澤去年與胡杏兒分手後,惟有寄情工作,將精力投放到生意上,繼早前在馬來西亞豪擲800萬港元開酒吧餐廳有回報後,雄心壯志的他再投資300萬元在中環開「蠔吧」,希望在自己地頭打響名堂,當其「廚神波士高」!

現年32歲的無綫小生黃宗澤(Bosco),人稱波士高,去年底與數名朋友合資約800萬港元在馬來西亞開設名為「House Music Club」的酒吧餐廳,不出半年已有回報,猶如為他注下強心針。Bosco索性將生意理念帶返香港,再找拍檔投資300萬港元,於六、七月在中環蘇豪區開「蠔吧」,一圓兒時做廚師的心願。

瞄準千呎旺舖

去年與胡杏兒分手後,受情傷的Bosco埋首在內地拍劇終悟出道理,認為應將精力投放到生意上。因Bosco在圈中投資有道,除樓、車、紅酒外,今次更染指飲食界,日前就被記者發現相約生意拍檔和地產經紀往中環蘇豪區睇心水旺舖。當日約下午三時,戴黑帽、黑超、穿黑衣的Bosco,低調現身歌賦街一帶,視察多間約一千餘呎的吉舖環境後,一行人便在餐廳落腳密密斟。約一個多小時後,Bosco便駕駛其新買的平治返家。

對於在蘇豪區開「蠔吧」,Bosco計劃多多:「我有幾個朋友都係搞飲食,又可以攞到酒牌,所以我今次想開『蠔吧』,等一班鍾意食蠔嘅朋友有個落腳地,大家可以聚吓!(心水舖有幾大?)一千呎左右我會易Handle啲,因為我都會落手落腳,又想設計埋菜單,我志願係做廚師,所以我會盡量參與!(蘇豪區擺花街有古巨基開舖頭?)擺花街舖位我都想搵,但最近冇舖,又好貴租,要諗諗……乜基仔喺嗰度開咩?(打造明星區?)又冇咁諗,最緊要搵到啱心水位置,因為飲食生意最重要係位置。」

內地身價上漲

此外,Bosco拍畢內地劇《少年神探狄仁傑》後,下月將拍攝無綫廿集新劇《貓屎媽媽》(暫名),與米雪合作。其實他在中、港兩地均有價有巿,其內地劇價更升至每集22萬,難怪餐廳開完一間又一間!

影視組

Bosco正式打入香港飲食界,將在蘇豪區開蠔吧,一圓做廚師的夢想。

Bosco與拍檔和經紀在街頭傾談後,便往多間吉舖視察環境。

滿肚密圈的Bosco(右二)細心聆聽經紀講解。

Bosco對千呎舖位感興趣,上圖是他目標之一。