連詩雅訴舊情

受盡情傷的連詩雅，藉新歌吐心聲，錄音時觸動內心痛楚，忍不住哭出來。一直放不低舊情的她坦言，不會再像從前般熱烈追求愛情！

連詩雅（Shiga）的新歌《說一句》，是《到此為止》及《好好過》的延續，歌曲代表Shiga的心聲，她說：「除咗自己，唔少情節都係幾多女仔嘅經歷，可以令時下嘅女仔有共鳴。」歌詞中寫到「還未刪的分手私信，千瘡百孔，我給你撇下了，爭氣點，學愛得高雅」，Shiga錄音時一度感觸哭了，她坦言在情路上屢受挫折，更一度放不低。

問到是否曾經被仔撇？她說：「唔係咁直接，但你會感覺到佢嘅態度好冷淡，個心可能已經愛上另一個，佢等你開口講分手先，但實際上佢個心已經撇低咗你。」曾被傷透的Shiga坦言，雖然已走出不愉快的陰影，但已對愛情失去信心：「依家冇以前咁唔開心，都冇之前咁抗拒愛情，但係人大咗就會冇咁渴求追求愛情。」

拍MV遇大風雨

MV因天氣關係一再改期，拍攝當日Shiga依然遇上大風大雨。僅穿單薄上衣的她凍得騰騰震，她笑說：「凍到對手起雞皮。」 雖然公司同事夠晒貼心，為她準備熱飲，不用埋位時又讓她穿上厚衣兼為她撐傘遮風擋雨，但她依然被淋濕，頂硬上的她笑說：「唔想影響MV嘅進度，寧願快快手拍完，最緊要冇淋病！」