As One賣萌爆喊

由金牌經理人黃柏高一手發掘的新進女子組合As One，甫出道走可愛韓風路線，迷倒不少男Fans。四女感激公司給予資源，即使每天要刻苦地跑步練氣、跳舞和唱歌，都樂在其中。

金牌經理人黃柏高（Paco）曾捧紅不少天王天后，被他的「慧眼」選中成為旗下藝人，相信少點實力也不可。由他發掘的新進女子組合As One（Shin、Nata、Elfa和Oli），外形既可愛討好，亦跳得唱得，入行短短一年人氣急升。一向緊接娛樂新聞潮流的ontv，日前邀請As One接受《娛樂OnShow》訪問，與主持廖嘉輝（阿Luke）暢談入行感受。

通常每隊組合也有一個隊長，As One卻表示四位成員各有專長，認為每人都是某方面的隊長：「好似Shin咁就係潮流隊長，佢好識打扮同留意潮流訊息，Nata就跳舞好叻，Elfa就識幾種樂器，Oli就負責唱歌，而As One嘅中文意思就係成為一體，代表我哋四個係一個人，好團結嘅意思。」主持阿Luke知道她們早前已為兩首新歌《Catch Me Up》和《Red Hot Hit 2013》拍攝MV，問到可會覺得辛苦？Nata說：「雖然每個MV都拍成十五個鐘，但我哋唔覺得辛苦，因為公司畀好多資源我哋，畀我哋跳舞同唱歌，而呢啲係我哋鍾意做嘅事，好Enjoy。」

Shin攬攬安慰

畢竟入行日子尚淺，令她們對每項工作充滿好奇，但要接受這些挑戰，有時也有壓力大的時候，Nata自爆拍攝MV時爆喊：「因為我本身性格比較Cool，所以第一次面對鏡頭要做可愛或者女人味重嘅樣，真係好緊張，仲喊咗出嚟，導演即刻畀我休息一陣再拍，Shin都即刻攬住我安慰我。（覺得邊個最識扮可愛？）Oli同Shin。」