蔣家旻闖陳國峰新舖偷師

最近巨聲2幫隊長陳國峰投資六位數字開日式拉麵店，邀請好友蔣家旻（Angel）試麵，愛吃日本菜的Angel食到嘴舔舔，她直言也有興趣做生意，會(目及)實國峰學做老闆。

不少藝人都會踩過界投資生意，最近巨聲2幫隊長陳國峰（Penny）與友人合資逾百萬元，在佐敦開設日式拉麵店，Penny透露他本人投資了六位數，可謂破釜沉舟，因此對所有事前準備工夫均一絲不苟，除了重金聘請專業日本師傅做大廚外，更請來「日本通」好友蔣家旻（Angel）試麵，期間Penny化身傳菜仔服侍Angel，Angel大讚麵質煙韌、湯底惹味，令她食指大動，為Penny注下強心針！

有信心回本

兩人食得開懷之餘，更殺入廚房跟師傅學番兩招，Angel負責切叉燒，Penny則煮麵，獲師傅讚似模似樣。Penny透露今次與節目《兄弟幫》監製Kent及幾位圈外友人忽發奇想做老闆，一拍即合，兩個月內完成搵舖位、裝修、請員工及擬定菜式等，暫時頗順利：「最開心係大家冇拗撬，而且講咗做就真係做到！（有信心回本？）有！但未必會咁快，知道做生意一定要守，第一次做老闆學到好多嘢，成個人成熟咗。」他直言最困難是找合適舖位，雖然現時店舖在街尾，但認為靠口碑一樣可其門如市，並推介麵店的獨家製作牛鹽舌及日式雲吞，相信會令顧客食過翻尋味！

至於鍾情日本文化的Angel都想開Cafe，主力賣日式甜點，但笑言較想主宰大局，因此先要努力儲錢做大股東：「最多同一、兩個朋友夾份，我想話事權大啲，夾嘅錢自然要大份啲，所以依家睇實Penny點做生意，吸收經驗。」