陸劍青雙劍合璧撼前輩

近年影壇吹起一陣聯合導演潮，繼彭氏兄弟造出成績後，副導演出身的陸劍青，去年亦與梁樂民孖住開拍《寒戰》，上映後不但大受好評，更打入今屆金像獎「最佳導演」候選名單，與林超賢、羅志良及鄭保瑞等實力導演拗手瓜。陸劍青坦言與樂民對電影的理念差不多，雙方一拍即合，加上大家擅長的範疇不同，故處理電影拍攝時可以分擔工作：「好似樂民美術叻啲，我就管理資金同人手問題，依家當係一個品牌咁做，嚟緊都會拍住上！」

談到芸芸對手，陸劍青指當中有曾合作過的，故今次能一起提名感到榮幸：「我唔睇重獎項。（睇好邊個？）羅志良同鄭保瑞，佢哋對電影有熱誠。」