秋生無價寶簽英皇 貪新公司近屋企

前晚英皇在「華鼎獎」掃獎，韓星李炳憲及黃秋生等晚上轉往英皇慶功派對，秋生以「英皇人」身份亮相派對，張敬軒則對加盟保持神秘。

韓星李炳憲、韓嘉恩及鍾欣桐男友K先生（權寧一），以及黃秋生、張敬軒、成龍、謝霆鋒、周杰倫、蔡卓妍及古巨基等，前晚出席完華鼎獎或志偉生日派對後，於十一時許陸續抵達跑馬地英皇駿景酒店參加英皇慶功派對，玩至凌晨二、三時許才盡興而回。

李炳憲與韓嘉恩等於凌晨三時許由保安護送下離開，車隊駛至酒店門口，李炳憲落樓即上車，未有回應記者提問。而任達華昨日透露與李炳憲在派對中敍舊：「識咗佢十二年，把握機會敍舊。（約佢出去玩？）冇喎！之前我哋喺韓國食過飯，佢好Fit。我成日去嗰邊接受訪問，算半隻腳入咗韓國演藝圈，有傾緊韓片。（擔心爆韓戰？）導彈都未射，有信心唔會射韓國。（擔心禽流感多啲？）大家衞生做好啲，香港做得好好。（老婆唔畀返內地？）唔會！過幾日我都去長白山拍《3D冰封俠》。」

游說張敬軒全裸

秋生以「英皇人」身份亮相，簽得新公司的他風騷搞Gag說：「我簽咗英皇經理人約。（簽幾多年？）細節未講，你可能唔信，我簽嘅原因係鍾意英皇Office喺灣仔近我屋企。（想好似杜汶澤、任達華、溫碧霞咁，簽英皇後試吓監製、導演工作？）我係演員，簽經理人係為接戲，冇理由走去做律師！以後英皇幫我接戲，我主力搞舞台劇，依家有兩個劇本，分別想搵張敬軒同劉嘉玲合作，正游說張敬軒全裸。」而英皇高層霍汶希則說：「楊生（楊受成）一直欣賞秋生才華，十一年前已經合作過，之後停咗，依家終於可以再合作，當然高興！（用巨額酬金吸引秋生？）秋生係無價寶！」

而張敬軒昨晨二時半隻身離開，對於傳簽約英皇，他說：「今晚嚟開心吓！」他離開前約半小時，關智斌與鄭希怡結伴離開，關智斌稱與李炳憲合照。同場的歌手劉晨芝低胸露背與單身貴族合和實業董事總經理胡文新直踩派對，問到是否跟胡文新拍拖？她說：「我哋係好朋友，識咗幾個月，佢唔係追我，我哋成日一齊出去玩。（你哋約會？）唔係！（連踩兩場去玩？）係呀！好平常，今次喺九展度搞，係佢地頭，今次嚟都係撐佢場。（畀機會追求者？）會！我都係單身，如果唔係咪成世單身？」

攬陳雅倫腰密斟

另外，覓得新公司的秋生，前晚在志偉生日派對中，被發現與低胸上陣的陳雅倫密密傾又搭腰，藝人方皓玟要求合照，影完後秋生又與雅倫密斟。