衞蘭牛一喊住要男友

歌手衞蘭（Janice）本月13日31歲牛一，一班粉絲為她提早慶祝。Dry到爆的Janice自爆希望收到男友作為生日禮物，而粉絲識做地送上「肉麻」祝福替她療「Dry」，令她哭成花面貓！

本周六便31歲生日的Janice，前晚出席約半百粉絲為她提早舉行的生日會。今次活動是由粉絲自掏腰包，扣除開支後餘款會撥捐聯合國兒童基金會作慈善用途。以一頭清爽短髮示人的Janice說：「其實係假髮嚟嘅，想趁機會試吓新形象，睇吓大家反應點，再決定剪唔剪啦！」

Janice坦言生日願望是能夠遇到桃花，又以結他自彈自唱《Thank You》感謝粉絲支持，粉絲回禮向她送上情深祝福，又預備了有Janice及其愛犬的卡通公仔生日蛋糕，最後大家更感動到攬住喊，場面溫馨。

自認揀擇

問到現時有否追求者？Janice慨嘆現在感情生活空白，沒有追求者，至於是否眼角太高？她說：「都係，想另一半都係信主，信主嘅男仔識得點去愛另一半，有藝術感嘅都好。（有冇收到生日禮物？）有呢個Party已經好感恩！（收個男朋友做禮物？）都OK！」另外，談及有報道指前老闆娘樂基兒再婚，她表示與對方很久沒見，對事件全不知情。