邱淑貞走後門隔離囡囡

H7N9禽流感在華東地區肆虐，雖然未殺到埋身，不過港人已愈益提高警覺！復活節假期過後，不少學校昨日開課，星級母親邱淑貞及徐濠縈親自上陣接囡囡放學，更「運路走」將囡囡送走遠離人群，意圖「自我隔離」心肝椗，可見用心良苦！

近日H7N9禽流感疫情惡化，疫情更疑似有南移迹象，隨時殺入香港！復活節假期過後，不少學校昨日都陸續開學，娛樂圈不少星媽都外弛內張，雖然暫未戴上口罩，不過仍親自接放學。昨日約中午12時，邱淑貞乘坐7人車往司徒拔道，接就讀小學的次女沈日放學，未幾見穿牛仔褲的邱淑貞下車，不過當她發現記者後，即上車戴回黑超，然後急步走到學校門口，期間不時迴避鏡頭。問到有否準備措施對抗H7N9？她一概沒有回答。愛女心切的邱淑貞可能見現場人多擠迫，即「運路走」與傭人及2位疑似保鏢帶同女兒從後門離開，似乎希望將囡囡與人群「隔離」！而同樣「運路走」的徐濠縈，昨午3時45分現身佐敦學校接囡囡陳康堤放學，阿徐沒有停下受訪，更「有入冇出」，疑與囡囡從後門離去。

確保衞生退惡菌

另外，方中信太太莫可欣及郭晉安太太歐倩怡昨日分別現身九龍塘及九龍城接送子女放學，二人亦異口同聲表示一向注重衞生，亦有叫仔女勤洗手預防疫症。莫可欣透露老公方中信稍後會到無錫出席活動，她坦言不會太擔心：「搵食要緊，會叫佢戴口罩！」而歐倩怡則表示老公郭晉安短期內不會到內地拍劇及工作。

至於陳慧琳（Kelly）昨日雖然沒有親自接大仔「蝦餃仔」劉昇放學，不過派出經理人鍾珍及傭人代勞，現場見蝦餃仔及大部分同學都沒有戴口罩，事後記者致電Kelly問會否擔心？她表示學校衞生措施足夠，坦言很放心：「如果蝦餃仔唔舒服或病咗，我都唔會畀佢返學。平時佢返到屋企，就會叫佢即刻換衫同洗手。」