盧巧音入紙嫁Kolor主音

歌手盧巧音（Candy）與樂隊Kolor主音蘇浩才（Sammy）的姊弟戀終於開花結果，兩人已入紙註冊結婚，Candy大爆男方前年聖誕節低調在家中求婚！

現年38歲的盧巧音（Candy）與34歲樂隊Kolor主音蘇浩才（Sammy）的「擬結婚通知書」昨日被張貼出，拍拖四年終拉埋天窗！其實Candy曾經歷與謝霆鋒、余文樂及紋身師的幾段姊弟戀，但無疾而終，直至2009年與Sammy拍拖，兩人經常出席公開活動大晒恩愛。其實早於2011年，Candy已宣布打算翌年結婚，但雙方以工作忙為由，婚期一拖再拖。

街坊裝買餸

兩口子昨晚六時離開大坑的同居愛巢到超市買餸，穿上街坊裝的Candy左手無名指更戴上戒指，相信是婚戒！當記者上前恭喜時，Candy與Sammy以微笑多謝，她在超市門口受訪，「準老公」則入內買餸，夠晒默契。提到入紙註冊結婚，Candy大方承認，並說：「係呀！但未定幾時簽字結婚，我同佢都好忙，之前有時間就去搞手續，諗住簡單啲。」

問到突然註冊是否「有喜」？Candy笑說：「有B？我都想！但真係冇，之前都講今年會結婚。（幾時生B？）養肥自己先，BB係上天畀，有就有。」她亦透露男友求婚過程簡單：「佢前年聖誕喺屋企求婚。（佢送乜畀你？）戒指！都係簡簡單單咁過。」最近忙於打理自家設計手袋生意的Candy，希望簡單低調處理婚事：「定咗結婚日期會同大家講。（搵相士擇日？）唔會，但會問Daddy，一定會一齊食飯，但未必多人。」其後，Candy入內會合Sammy，買完餸便返家玩煮飯仔。