陳淑芬再提「訊息」 三度落淚

為紀念張國榮（哥哥）逝世10周年，由哥哥生前經理人陳淑芬策劃的一系列紀念活動完結後，陳太昨晨到寶福山拜祭哥哥。現場有半百來自日本及內地的「哥」迷，陳太特別準備了很多祭品，包括寓意祝福的紙鶴、蛋糕、生果、鮮花、而紙紮祭品則有巨型跑車、紅館、導演專用椅等。

對於將哥哥的訊息「我終於可以好好舒服瞓一覺」帶給大家，陳太三度感觸落淚：「其實呢一句係引子，播出嘅歌詞先係重點，哥哥想大家明白要將傷心征服，開心活下去。」

哥哥摯愛唐鶴德（唐唐）罕有一連三日出席紀念活動，也令陳太感動：「隔咗咁多年佢終於走出傷痛，係走咗好大一步，亦令到我放心。」她希望傳媒不要去騷擾唐唐生活：「咁難令一個人走出嚟繼續佢生活，希望大家畀啲空間佢。」她亦有信心歌迷摺的紙鶴能於本月10日限期前，達成1956912隻目標，為哥哥再創紀錄。

此外，有內地時事評論員批評哥哥，張敬軒忍不住在微博轉載爆粗反擊。而無綫上月31日轉播哥哥《繼續寵愛．十年．音樂會》及劇集《仁心解碼II》分別收到5及7宗投訴，指宣揚同性戀、易服癖、內容不雅、對兒童有壞影響及醜化宅男。