JJ爆粗撇阿叻

賈曉晨（JJ）與「力王」樊少皇愛得癡纏，事事「力王至上」！前晚她在微博宣布不再與經理人公司續約時，因網友留下「小三」二字大動肝火，爆粗反贈「TNND（他奶奶的）」，猶如患上「小三恐懼症」！昨晚她出席活動時以新短髮形象示人，期望告別「小三」外，又風騷自爆男友揚言養她，叫她唔使做！

現年30歲的賈曉晨（JJ）與「力王」樊少皇的「力J戀」打得火熱，但JJ因掛住拍拖，被陳百祥（叻哥）指情緒化，本應於上月續約一事終告泡湯！前晚JJ在微博中發表「離巢感言」，指昨日對她而言是很特別的日子：「九年了，有種說不出的感覺，謝謝叻哥，謝謝一直帶我前進的經理人文狄（滌）」。自言會「更努力繼續向前走」的JJ看似心情輕鬆，但她與網友留言對話時，卻被對方留下的「小三」二字觸動神經，扯火爆粗回應，猶如患上「小三恐懼症」！

鬧網友留言過分

前晚JJ發表「離巢感言」後，未幾即有網友留言：「你怎麼老是接小三的戲呀？你這麼漂亮，不挑劇本的嗎？」未夠一分鐘，JJ即火速爆粗回應：「不接了！TNND（他奶奶的）！」其實JJ除了多演「小三」角色外，在「力J戀」中亦曾驚傳做小三，因此令她對「小三」甚為忌諱，見字時才忍不住爆粗以示不滿。

事隔一晚，昨晚JJ出席中環《皇金拳賽》記者會時，剪了一頭清爽短髮，她坦承未有續約：「都可以咁講，尋日（前日）合約完咗，咁多年一齊打拚，講唔出有咩感覺，有啲失落，但係時候要試新嘢，要進步。」又謂與叻哥「再見」亦是朋友：「叻哥好支持我嘅決定，佢好好，叫我自己決定、自己選擇。咁多年同叻哥合作好開心，好似朋友同親人，互相信任對方。」問到離巢是否與楊焉（Carol）加盟有關？她否認並大讚對方好索，又透露已有很多公司接洽及否認離巢為準備結婚：「結婚同工作係兩件事，冇咁快結婚，我想事業有明確方向時先結。」

問到樊少皇有否給意見？JJ即時笑到甜絲絲地說：「佢好錫我，話最緊要我開心，佢係我嘅後備支柱！（佢有冇叫你唔使做？）佢真係有咁同我講，話唔做都得，但我唔鍾意畀人養。」至於在微博中因「小三」扯火一事，她直認火起：「有時啲網友留言真係過分！（唔想再做小三？）想做多啲正面角色，想平均啲！」她數得出早前在電視劇《名媛望族》中已是第五次做「小三」。另外，同場出席者包括鄭融、高海寧、打扮性感的模Monna（林宜芝）、Iris（鍾采羲）和Celia K.（郭穎兒）等。

「可能佢想結婚」

記者致電叻哥，他表示不清楚JJ未有續約：「問經理人啦！我淨係精神領袖嚟！前幾個禮拜同JJ食飯，當時佢仲未決定去向，依家決定好咪好囉！」他澄清彼此沒有不和：「可能佢想結婚啦！（佢有講過？）我估咋！」對於JJ不滿常演「小三」角色，叻哥說：「係咩？唔覺喎！」至於有指Carol取代JJ傳聞，叻哥說：「冇關係，總之大家冇Hard Feeling，我精神上支持佢！」

而JJ經理人文滌則說：「大家保持友好關係，和平分別。（離巢原因？）可能JJ覺得喺同一間公司太耐，總之好來好去。（JJ結婚？）冇聽過。（關唔關樊少皇事？）一半一半啦！（JJ不滿小三角色？）好壞參半啦！我哋一直有同佢篩選過。（佢喺微博爆粗喎！）可能佢做嘢忟憎，我哋冇逼過佢接任何角色。（佢一向都火？）都有啲o架！藝人總有啲火氣，走得就梗係有啲不滿啦！」有傳文滌會隨JJ離巢，不過文滌否認其事：「我會緊守崗位，不過點都會祝福佢，我湊大佢，佢當我老竇咁！」