城城婚前誓做金像影帝

郭富城與張家輝宣傳新戲《同謀》，兩大影帝首次合作即老友鬼鬼，家輝更笑指要請教催谷緋聞之道！早前與苟芸慧傳緋聞的城城表示「藍桃花（爛桃花）已成過去」，並明言要先在香港奪影帝才會結婚，正印女友熊黛林（Lynn）似乎要多等一陣子！

剛完成演唱會的郭富城最近埋首宣傳寰宇新戲《同謀》，他昨日在觀塘apm出席活動時與現場觀眾大玩遊戲。早前有報道指他在床頭「擺笛求子」，城城受訪時澄清：「支筆喺人哋度，笑吓咪算囉。（想生仔？）暫時都係工作為主，我拍戲努力咗10年，到依家都未喺本土攞過獎。（《寒戰》冇提名好多人戥你唔抵。）多謝媒體同觀眾對我嘅支持及安慰，但會尊重大會嘅決定，冇任何怨言。（《寒戰2》拍嘅時候再添壓力？）唔會，我對自己嘅演出其實好有信心。」問到若本屆金像獎邀請出席助興，他可會到場？他表示會盡量配合參與，並半開玩笑地指誓要在香港得獎後才會考慮成家立室，似乎是想考驗緋聞女友熊黛林的耐性！現場所見，城城已將演唱會時染成藍色的頭髮染黑，似是要與「爛桃花」劃清界線，他說：「呢啲嘢過咗去，唔講嘞！」

張家輝被問到開工時可有見過城城的「女友」前來探班？他笑說：「冇喎，佢份人好正直o架！不過我都應該要佢幫手搞吓緋聞，點解我搞咗咁多年都搞唔起？」

張家輝鐵漢怕曱甴

他又大讚城城照顧拍檔，並透露在馬來西亞拍外景期間，曾遇上不少蛇蟲鼠蟻「突襲」，城城知道他「忌諱」，多次主動打死曱甴，又大步行嚇走老鼠，十分貼心！記者取笑他細膽，他即反駁：「我有童年陰影呀，況且會傳播病菌嘛！我繼王羽之後稱得上『影壇鐵漢』，好似我做警察時，見過有人墮樓，行埋去後佢攬住件冷衫，點知原來係爆咗肚！腸同肺都流晒出嚟，但我都冇驚。」