B哥哥嬉皮笑臉「登六」
鍾鎮濤昨晚舉行60歲生日派對，雖已屆花甲之年，但他可謂「歲月不留痕」的最佳見證，一身嬉皮士打扮型到爆！他笑言還有心有力，要與3個寶貝女繼續上山下海，增廣見聞！
昨晚鍾鎮濤（B哥哥）在深灣遊艇會舉行60歲生日派對，筵開15席大宴親朋，到賀好友包括張學友、劉嘉玲、邱淑貞、陳百祥夫婦、曾志偉、譚詠麟（阿倫）及梁家輝夫婦等，為配合嬉皮士主題，眾人都悉心打扮，力爭3萬元最佳造型獎！
壽星B哥哥戴上假髮、頭巾及黑超配襯喱士恤衫，打扮入型入格，完全不似6字頭！他偕女友范姜及3名寶貝女嘉晴、鍾懿及鍾幗受訪時，幽默地自嘲「60歲滿月」：「其實本身係2月23日生日，但之前阿倫開演唱會嚟唔到，所以改為今日。」
設3萬蚊造型獎
貪玩的他刻意揀選「嬉皮士」作主題：「唔打扮會畀人鬧，扮得靚就會有3萬蚊現金獎！」身為評判的他笑說：「如果係我就一定頒畀鍾懿！（咁即係鍾懿拎啦？）咁又唔係。」談及生日願望，外表「保鮮」的他突然認老：「依家60歲，病咗幾日都未好，病緊時好無助，所以依家想做嘅嘢就盡量做，見多啲朋友！」他隨即又話鋒一轉，變得生生猛猛：「趁依家仲有牙力、有朋友、有力玩，可以同埋佢哋（3個囡囡）上山下海，想帶佢哋多啲出國見聞！」
婚期范姜揸Fit
問到今年會否與范姜結婚，B哥哥說：「結婚都係開Party，唔會今年啦！因為流年唔好。」但隨即賣口乖說：「老婆愈老愈可愛！今年搞住呢個先，最快都要第二年。」在旁的范姜夫唱婦隨：「我唔心急，其實都係睇我決定！」B哥哥即搞笑地說：「佢先係最高決策人！」期間，鍾幗兩度獻吻，場面溫馨，而大仔嘉浚因身在美國而未能出席。此外，細心的B哥哥特地為傳媒準備半百飯盒，非常有心。
化身型爆嬉皮士的B哥哥，以「6」字手勢慶祝「登六」。
細女鍾幗咀完又咀，壽星B哥哥冧到爆！
低V上陣的劉嘉玲心情大靚，揮手打招呼後才進入會場。
獨自到賀的邱淑貞笑笑口揮手，明艷照人。
撇下男友林峯的吳千語未有作嬉皮士打扮，要打Pat Pat！
張學友（圖）與梁家輝夫婦出席派對賀老友。
梁家輝夫婦
陳嘉容依足主題打扮，但男友則便裝到賀。
蔡一傑（左）與陳欣健悉心打扮爭造型獎。
陳欣健