周渝民三句話打動于仁泰

向來寡言的台灣男星周渝民（仔仔），獲導演于仁泰度身訂造角色，原來當日二人見面，仔仔亦相當「惜言」，只短短三句說話便令于導知道找對人！

闊別香港六年的導演于仁泰，最近「回歸」華語影壇執導《忠烈楊家將》，找來鄭伊健、林峯、周渝民（仔仔）及吳尊等公認靚仔孭飛，欲透過電影帶出忠孝仁義訊息，于導透露拍攝期間眾人於戲裏戲外也儼如一家人，感情要好。

伊健忠奸大兜亂

于仁泰於選角時化身「社工」與眾男傾心事，仔仔全片僅四句對白，其餘時間以眼神演戲。回憶見面情況，于仁泰笑說：「當時喺台北見仔仔，傾咗唔夠兩個鐘，全程佢只講過三句說話，就係『哈囉導演、你想我點演個角色、多謝導演』，但呢啲係我想要嘅，因為佢演狙擊手，要冷靜同眼神好利，仔仔有呢個感覺，我叫佢做番自己。」

于仁泰又指伊健的角色一波三折，角色一度由古天樂飾演，伊健則改演反派，不料開拍前古仔腳傷辭演，令伊健要再調節心理「變番」正派。而吳尊與片中父親鄭少秋不乏對手戲，于導大爆拍策騎場面的笑料：「吳尊後面坐嘅係秋官，馬鞍前有塊鐵，每次秋官一向前撞吳尊就叫，因為整到佢唔舒服（下體），後來劇組要將馬鞍改一改。」于導指秋官外交手腕不俗，又不時教一班戲內兒子化妝。問到曾否見到林峯的女友吳千語探班？于導說：「邊個？嗰時未！（潘霜霜？）冇。個個仔都好多粉絲，但佢哋好專心埋位！」