許廷鏗賺人仔被禁「愛」

歌手許廷鏗（Alfred）有意北望神州吸人仔，最近閉關苦練唱腔參加內地Hit爆歌唱比賽，但為免惹起醋意，公司已落「柯打」嚴禁他對粉絲示愛。Alfred亦首度回應被林欣彤「拗直」的緋聞，並自爆肥瘦都Like！

許廷鏗日前到廣州舉行戶外新碟簽唱會，吸引逾百名歌迷到場舉牌吶喊支持，雖然活動當日天陰陰，幸最終沒有因天雨關係而腰斬，亦無損粉絲熱情。簽名期間，不少粉絲要求Alfred在唱片上寫上「愛的宣言」，但為免觸動其他歌迷的神經，公司已下令嚴禁他輕易「示愛」，Alfred笑說：「唔少粉絲要求我寫『我愛你』，但一一畀公司制止！」

積極開拓內地市場的Alfred坦言賺「人仔」相當和味，更瞄準參加Hit爆歌唱比賽《我是歌手》，希望與前輩齊秦、黃貫中及林志炫等實力派歌手同台較量。Alfred先行勤練唱腔，希望他朝會被選中參與：「我真係好想參加，因為啲歌手真係好勁，我知自己未夠資格，所以成日上網睇片學新唱腔做好準備。」

讚欣宜瘦咗

雖然曾與鄭欣宜傳緋聞，但性向仍惹來問號的Alfred，近日再傳被「巨聲幫」師妹林欣彤（Mag）「拗直」，他首度回應與Mag的緋聞：「真係普通朋友，因為之後會有合作先一齊食飯。（驚做羅孝勇同Mag之間嘅小三？）太複雜喇！巨聲幫入面特別多緋聞。」問他喜歡脹爆欣宜還是暴瘦Mag？他笑說：「欣宜已經瘦咗好多，同埋做朋友唔關外表事。（擇偶呢？）肥瘦都冇諗咁多，暫時唔理兒女私情。」他表示不介意多次被指「被拗直」，反而希望少惹是非。