蔡志明見親家捉實唔放

玩具大王蔡志明的兒子蔡加讚前晚出席集團旗下公司的周年晚宴，其女友汪圓圓偕同父母到賀，蔡志明見到未來親家後心情興奮，立即與對方握手！蔡生又笑稱兒子為「老闆」，要求加讚送手錶給他，貫徹其幽默作風。

喜運佳鐘表集團主席蔡加讚前晚出席在尖沙咀舉行的《「喜運佳．譽一」25周年晚宴》，蔡家上下包括蔡志明夫婦、蔡加敏及蔡加怡等均有出席。加讚與女友汪圓圓計劃於今年11月30日結婚，故前晚亦有邀請未來岳父及岳母前來出席晚宴，令兩家有更多機會碰頭。蔡志明甫見親家，即高興地與汪父握手。

心情不俗的蔡志明更笑稱兒子為「老闆」：「後生仔做多啲，又係佢興趣，要落多啲心機做！都做得幾好，依家等緊佢送隻靚錶畀我！（唔係你送畀佢至啱？）佢做老闆，梗係佢送！」加讚聞言即一口答應，並表示會送上價值千萬的手錶給父親，在旁的女友圓圓亦對此叫好。

積極向內地發展

圓圓去年亦有出席公司的周年晚宴，並透露在抽獎環節獲「未來奶奶」蔡母抽中，雙方甚有緣分！加讚說：「兩年前收購咗公司後，喺香港、澳門同內地開設超過30間店，未來都會向內地發展，有好嘅地方就會發展！（爸爸有冇獎勵？）遲啲會更加好，再有啲成績先，等個報告再靚啲，啱啱農曆新年嘅營業額比上年有150%增長，自己都好滿意！」他表示幸好由圓圓負責安排婚禮，令他可以有更多時間專注工作。