黃秋生歡迎阿澤睇新片

黃秋生前晚以唐裝Look出席《葉問—終極一戰》首映,問到有否邀請同樣演過葉問的甄子丹及梁朝偉欣賞首映?他說:「我都冇飛!啲飛去晒老闆度。(會請傳不和嘅杜汶澤睇戲?)關咩事?個個都可以睇,乜嘢係演技,你估人哋唔識咩?(同阿澤電聯?)我份人好孤僻,同劉青雲都少聯絡。」對於有民意調查指有市民不滿亞視,秋生笑說:「我個工人有次唔覺意轉咗台去亞視,我都叫佢快啲轉走,因為我見到有兩個博士用亂噏嘅普通話討論認真嘅問題,好似睇緊小丑。」

此外,秋生昨日揚言會對指他搭上《葉》片女演員周楚楚的雜誌採取法律行動:「交咗畀律師,會循侵犯我家人私隱同誹謗兩個途徑研究,叫本雜誌準備接招!」

秋生(後排中)展示「武林之光」四字,氣勢逼人!