阿嬌捱打K先生笑住睇

鍾欣桐前晚獲韓籍男友K先生撐場，出席她有份演出的《葉問—終極一戰》首映禮，她表示K先生是應男主角黃秋生邀請出席，並謂男友看到她拍打戲不會心痛，又抱怨男友太忙，公然撒嬌。

楊受成夫婦、冼國林、黃秋生、鍾欣桐（阿嬌）、陳小春、葉準夫婦、林小明及黃百鳴等，前晚亮相國藝影視與英皇電影聯合投資的《葉問—終極一戰》首映禮，獲男友K先生（權寧一）撐場的阿嬌說：「佢（K先生）知道有得睇首映，話『好緊張』喎！（你專登請佢嚟睇？）唔係，好似係黃秋生叫佢嚟，佢興趣係睇戲，睇咗咩好戲都會推薦我睇，之後又陪我睇一次。（佢見你拍打戲會心痛？）佢都唔知睇得幾開心，其實我想搵佢一齊學拉丁舞，但佢話太忙。（有冇幫你開拓韓國市場？）傾緊，我有叫佢教我韓文，佢會即席教，但我覺得有本書先似樣。」

低調入場惹哄動

戴黑超及穿黑西裝的K先生，甫到場即引起一陣小哄動，英皇高層霍汶希（Mani）安排他入座後，仍引來傳媒爭相拍照，但K先生未受影響，脫下黑超後專心留意女友於台上的一舉一動，以眼神默默支持女友。

小春七月做老竇

而即將做老竇的陳小春說：「我老婆七月生，我會陪佢。（幫手剪臍帶？）我以前都剪過吓頭髮，但剪臍帶咁專業，交番畀醫生，冇理由飛髮佬做。（老婆當你出氣袋？）唉！男人雖然冇子宮，但都有賀爾蒙o架！我都感受到佢辛苦，但呢啲嘢係要『（硬）食』囉！」他又謂知道蛇B是仔後很開心：「希望第時一家大細去滑雪。（你停工未？）一路Keep住有工作搵我，但太遠我唔接。（損失好多？）用損失嚟衡量嘅，就唔係陳小春！」而匆匆趕到的香港電視主席王維基則以趕入場為由，拒答有關申請免費電視牌照的進展。