城城有Lynn揸手

郭富城前晚開第八場紅館騷，女友熊黛林（Lynn）再現身捧場，城城表現風騷，除了掀衫露兩點外，更刻意與Lynn握手，令Lynn甜到漏！

郭富城的紅館個唱前晚踏入第八場，女友熊黛林（Lynn）再度高調到場欣賞，並坐於正面台約第三行位置，阿Lynn全晚表現投入，不時揮動螢光棒，看得如癡如醉。而城城當晚亦表現得特別風騷，經過一輪勁歌熱舞後，身穿銀色背心的他對正面台說：「我依家冇乜肌肉，得棚骨，好熱好想除衫！」之後他又掀起背心露兩點，令歌迷尖叫！及後更有觀眾大叫「除褲」，城城說：「吓！咁鹹濕o架！」

到握手環節時，城城由正面台開始握手，繞場一周後，城城再走到正面台，刻意彎腰與Lynn握手，Lynn即笑到見牙唔見眼，明顯冧爆，而身邊歌迷亦望到實一實。

自認小Fans

最後的跳彈床環節，城城不慎失手，跌坐於彈床上，但仍繼續賣力演出。Lynn於騷後被城城歌迷要求合照，心情大靚的她有求必應，當她與同事離開時，被問到覺得個唱好不好看？她即大讚好睇。問到與城城握手是否宣示主權？她說：「唔係，我都係Fans。（喺Fans面前握手承認關係好Sweet？）唔好意思，唔好意思。（講幾句感受？）好開心！」