張兆輝踩通頂爆瘡 未必再拍無綫劇

張兆輝與謝天華主演的無綫新劇《神槍狙擊2013》前晚煞科，由下午開始廠景加外景直踩到天光，凌晨到室內War Game場拍攝決戰的結局戲，天華未埋位，雙眼已滿布紅筋，輝哥亦下巴爆瘡，同劇的岑麗香及翟威廉等「飛虎隊成員」則在二人決戰後才加入救援。

輝哥早前曾呻通告混亂冇得抖，他說：「劇一定會繼續拍，但未必會喺香港，無綫劇就要睇吓檔期喇。一向都知喺TVB拍劇辛苦，但依家體力冇以前咁好，年紀每大一年就要瞓多一個鐘。」已有數月未能陪伴家人的輝哥，期望復活節能共享天倫樂，至於天華亦會在煞科後離港休息。

另外，天華在《神》劇的角色亦正亦邪，自言在劇中「擔屎唔偷食」的輝哥，不介意對方的角色較搶鏡：「如果佢爆咗都恭喜佢，但最緊要套戲有好反應！」此外，昨日有報道指天華曾因病「冧廠」，令曾直踩30小時的輝哥不滿無綫大細超，大罵無綫「冇人性」。對此，輝哥昨日接受電話訪問時表示，從沒接受該周刊訪問：「如果有不滿，我會直接同公司反映，況且天華都冇冧廠，咁樣講對TVB好唔公平。」