千嬅讚完老公讚自己

楊千嬅前晚出席活動時否認撮合台灣女星陳喬恩跟古天樂，她又表示如果有男生一定先介紹給王菀之，因對方見她標到尾會，曾問可有像她老公丁子高這般質素的男朋友介紹，乘機曲線大讚老公高質素。

楊千嬅前晚以聯合國兒童基金會大使身份，出席觀瀾湖深圳《新生活．新地標．樂派對》發布會，其他嘉賓還有盛智文、王敏德、Rick Chin、何國鉦和甄文達等。千嬅被問到有指她撮合台灣女星陳喬恩跟古天樂，她即說：「吓，咁勁？我做咗16年娛樂圈都冇聽過呢啲，真定假呀？好勁，咁勁我自己都唔知。（你知佢哋兩個都冇拍拖？）我淨係知我個仔冇拍拖啫！（你幫佢哋Line Up飯局？）點解會寫到我o架？我識得陳喬恩，當然都識得古天樂，我識好多人，但係搭埋一齊唔啱數，係個美麗嘅誤會，自己冇聽過，真係創新。」

幫囝囝做紅娘

她透露將於5、6月跟古仔合作拍戲，問可有留意古仔普通話有否進步，她說：「佢進步咗好多，佢多咗喺內地拍戲。（佢有女朋友做私人教練？）吓，咁創新？我真係唔知。」

千嬅又謂如果有男朋友一定先介紹給王菀之，還乘機曲線大讚老公丁子高：「王菀之見我標到個尾會，問我有冇啲好似我老公咁嘅質素男仔介紹，佢想拍拖，佢一嚟就要男朋友冇辦法，嗰啲紅娘我又唔會做，我做娘親o架啫！」她又透露還會跟張家輝合作另一部戲，她跟家輝曾於14年前合作，今次兩人將扮演夫妻，令她很期待。她坦言若離港拍戲會掛念囝囝，有機會也可帶他開工，寓工作於湊B，又大讚囝囝現在9個月大已很聰明。她又笑言只會幫囝囝做紅娘：「不過老公話唔好，要畀個仔自由發展，因為佢自由發展都搵到個咁好嘅老婆。」

而王敏德（Michael）則與兒子王躍穎一起出席，提到陳百祥日前打高球致胸骨移位，他說：「有次同朋友打波，打完第二日起身個背脊下半部好痛，痛咗幾個月，有做針灸，醫生話我啲骨勞損。」