陳嘉桓扲荷包撐冼師傅出書

女星陳嘉桓（Rose）、王梓軒及范振鋒等昨日齊齊為國藝影視老闆冼國林推出詠春拳術的書本及研討會站台，眾人自掏腰包買書支持。期間，有書迷問冼師傅如何評價電影《一代宗師》內的詠春？他打趣說：「王家衛拍電影唔係漆黑就係落雨，邊個喺度打都唔清楚，個個行埋去都可能好打過章子怡，呢方面我要學習。」他又坦言不會再開拍詠春為題材的電影，見好就收，但年底會再開戲推廣洪拳。

而范振鋒簽約英皇後，電台及電視台工作兩忙，他笑言幸好老婆李思欣未懷孕，否則相信會應接不暇。Rose則透露稍後會投入拍攝兩部新片，但閒時會繼續跟師傅練功。