周麗淇想咀謝天華

周麗淇（Niki）新劇收視高開，前晚舉行慶功宴，男主角謝天華開工都趕來，Niki則遲大到惟有埋單謝罪，連解釋都慳番。至於成功減肥的呂慧儀，豪言收視若過45點會以三點式泳衣慶祝。

由周麗淇、呂慧儀、謝天華及高鈞賢等主演的無綫劇《女警愛作戰》收視最高32點，前晚舉行慶功宴，呂慧儀與老公黃文迪最早到場，連要開工的天華亦趕到，反而女主角Niki姍姍來遲，要成組人餓住等。及後趕到的她雖然知衰，但不想解釋：「遲咗就係遲咗，點解釋都冇用。（埋咗張單謝罪？）冇所謂，大家食得開心就得。（收視再高點慶祝﹖）我都冇身材，露無可露，聽講會開下集，到時咪激吻謝天華囉！」

呂慧儀三點式慶祝

而呂慧儀明顯清減，她扮可憐扁嘴說︰「我老公唔畀一餐好飯我食。（瘦咗上圍有冇縮水﹖）唔知，你問我老公。」而剛巧經過的黃文迪說：「冇呀！我有畀飯佢食，係佢要減肥，我做佢健身教練，操得佢幾Fit。」而自知減肥成功的慧儀表示，若收視過45點可露長腿，更笑說：「着三點式都得！」

由於最近兩套劇都有高鈞賢演出，雖然他未有出席《女》劇慶功宴，但其緋聞情人葉翠翠昨日出活動時指有留意對方，並力撐他演技非靠表面：「佢喺《女》做警察係正派角色，而另一劇做反派，雖被批評唔夠霸氣，但我覺得壞人冇樣睇，點都撐佢！我都想演反派，因為做壞人角色有挑戰性。」