Lynn寸苟姑娘爛桃花

郭富城（城城）與苟芸慧（苟姑娘）早前因合作傳緋聞，城城的正印熊黛林（Lynn）前晚出席活動時自嘲冇桃花，並勸告城城不要惹爛桃花，似暗示對方遠離苟姑娘，大發雌威。

名模熊黛林（Lynn）、混血女模Cara G.、Jessica C.、周汶錡、傅嘉莉、馬詩慧及黃佩霞等前晚盛裝出席Miss Dior-The Fragrance of the Creator Exhibition開幕酒會，對於苟姑娘形容與城城的緋聞是爛桃花，Lynn哈哈大笑說：「爛桃花咪唔好惹囉！唔惹咪冇事。（叫人唔好惹城城？）我好慘，冇桃花，咩都唔惹就冇事。（叫佢少搵苟姑娘？）有搵過咩？」Lynn自稱性格怕麻煩，所以少有緋聞纏身。

至於苟姑娘也有欣賞城城演唱會，而且座位位置比她的更好，Lynn不在乎地說：「我想同Fans一齊癲、一齊叫，情願喺第一行握手位。（城城隻馬由『愛河』改名做『愛將』，係咪同苟姑娘有關？）有咩關係？（城城經理人小美送飛畀樂易玲，覺唔覺被剃眼眉？）唔知呢，公司安排就服從。」

「唔好嘅事纏住冇辦法」

Lynn表示未見過苟姑娘真人，但睇相覺得對方很Sweet，又指不介意城城傳緋聞，她大方地說：「佢唔介意，我都唔介意，佢Handle到就得。（你有信心？）我冇嘢，就算自己唔想，唔好嘅事要嚟纏住都冇辦法。（你唔識呷醋？）我反應比較慢。（同城城講呷醋啦？）唔會，咁忙，唔會拎其他事煩人。（感情更好？）唔會有變化，咁無聊，過去就過去。（會唔會更急結婚？）慢慢。（咁慢，所以先有苟姑娘出現？）唔識答。（催婚？）想做就係再做好自己。」

同場的Cara G.透露，完成前晚的活動後便出發往泰國準備本月30日舉行的婚禮，她坦言心情超級興奮，不過度蜜月要等半年後，因為結婚花費太多錢。另外，昨日是Cara的生日，她在Instagram上載一張性感床照。