Kary「樂」實戀情騷價飆5倍

吳雨霏（Kary）被踢爆秘戀余文樂後，兩口子愛得癡纏，她更被《好報》拍得行「奶奶政策」，與樂媽往上海探樂仔班，Kary更因「樂霏戀」而令騷價即時急升五倍！前晚她出席活動時又承認樂仔曾帶她出席沈嘉偉的死黨飯局，進一步確認戀情！

經過上月十天倫敦之旅後，「樂霏戀」更跨進一步，雖然余文樂近日往上海開工，但Kary見少愛郎一面都唔得，昨日被《好報》踢爆行「奶奶政策」，趁白色情人節與樂仔母親飛往上海探男友，展開五天甜蜜之旅！雖然Kary今次上海之行保密工夫做到足，但返港時仍被拍得與樂媽同機，仲唔斷正！如今連「未來奶奶」都冧得掂，難怪Kary如此風騷！其實成為多個大品牌寵兒的她亦多得戀情帶挈身價九級跳，據知亮相品牌活動由原本的兩萬元飆升到現時逾十萬元，前後不到一個月，近期更一直有升冇減，直逼天后價！

周柏豪爆上海有女伴

就如前晚Kary便與過氣緋聞男友兼樂仔死黨周柏豪出席I.T舉行的《Valentino Pop-Up Store Cocktail Party》，每當談到樂仔時，她都冧笑回應！柏豪為保護「阿嫂」，還為她擋駕搞爛Gag打圓場。問到柏豪有冇嗌Kary做「阿嫂」？Kary只懂傻笑兼嘩了一聲，在旁的柏豪醒目地說：「我哋啲年輕人冇話有乜特別尊稱！」問到近日是否特別開心？Kary風騷地說：「我不嬲都開心o架啦！」

見完家長的Kary再被問到有否出席樂仔與一班好友的飯局，她即時面都紅晒，尷尬承認跟男友出席過有關飯局：「有見過面，同朋友食飯好正常！」柏豪見狀加把口：「我都有去食過！」再問Kary以甚麼身份出席？她只說：「都唔知乜身份，只係諗識新朋友！」可謂進一步落實「樂霏戀」！

再談到樂仔在上海開工時被傳攬女，Kary對男友百分百信任，指樂仔開完工便會返港，更大笑地表示並不擔心樂仔再攬女，可是在旁的柏豪卻插嘴說：「佢喺上面真係有條女！」Kary立即瞪大眼睥實柏豪，他即得戚地說：「佢阿媽咪上咗去囉！」她即無奈大笑！然而，Kary早前對飛往上海探樂仔一事不置可否，但前晚終於承認：「係！有去過幾日！」問到有否與樂仔同房？她尷尬地說：「呢個問題Out咗喇！」

記者昨日再次致電Kary，對於《好報》踢爆她行「奶奶政策」，陪樂媽到上海探樂仔一事，Kary一味冧笑說：「Auntie好Nice，但感情問題唔想多講！」