李炳憲闖荷里活遭白眼

【鍾沛霖韓國直擊】近年登陸荷里活的韓星李炳憲，早前與新片《義勇群英之毒蛇反擊戰》（G.I Joe：Retaliation 3D）拍檔包括大隻佬狄維莊遜（Dwayne Johnson）於首爾宣傳，他自爆在片場拍攝時受盡種族歧視！

再度拍攝《義勇群英》系列的李炳憲，今集與對手連場埋身肉搏，又有內心戲，戲份大增！他不但獲導演朱浩偉（Jon M. Chu）及同片拍檔迪維大讚，並被傳媒指騷出實力，難怪他受訪時直言因獲好評而非常開心。談到拍荷里活片與韓片的分別，李炳憲表示用英語演戲較困難及兩地文化大不同，他更爆出拍攝時曾遭冷待：「有一個人，我唔可以講名，不過好幾次主動同佢打招呼同握手，佢都扮睇唔到又冇反應，之後直至拍完戲我都再冇理佢，冇諗過會咁，真係好震驚！」難怪他寄語「外闖」韓星首要學好英文，且要心胸廣闊及多包容。

六舊變一塊

問到於片中大騷六舊腹肌及Fit爆身形的他有否Keep住肌肉，他即大叫：「No Way！」又笑指現時只有一塊，更扮激氣反問記者是否只睇腹肌才讚其演技，場面搞笑！拍住「大隻佬」狄維，李炳憲自爆拍攝前膽粗粗問對方可否不除衫，狄維笑言要看導演安排，最後他只好要求導演別讓狄維於片中半裸，以免自己睇落變得「好細隻」。

至於今次於片中擔大旗演連場槍戰的狄維，被問到「大隻佬」身形會否令戲路較窄，他笑說：「其實每個角色都有獨有嘅特質，我諗《斷背山》（Brokeback Mountain）都唔會搵我拍啦！哈哈！但我真係好欣賞啲演員同導演o架！」而在片中飾演G.I Joe「新丁」的女星Adrianne Palicki及型男DJ Cotrona一度被傳於前年拍《義》片時撻着，更曾被拍到十指緊扣外出，雖然女方受訪時仍口密以「好朋友」形容DJ，但二人不時互讓發言，又情不自禁大讚對方，關係耐人尋味！