秋生扮葉問無聲勝有聲

黃秋生及導演邱禮濤日前亮相《娛樂onShow》，與主持俞詠文（Angela）大談戲中趣事。一向「有嗰句講嗰句」的秋生，坦言不會因早前微博事件影響，會繼續堅持自己，不作出改變！

每集內容都非常精彩的《娛樂onShow》，今次主持Angela請來導演邱禮濤及黃秋生亮相，大談拍電影的趣事。由國藝影視及英皇電影合資的新戲《葉問──終極一戰》，早前入選烏甸尼斯遠東電影節競賽單元，導演邱禮濤坦言電影入圍感到開心：「入圍當然係開心啦！不過都拍咗咁多年電影，都慣啦！」秋生則笑言要減肥參加電影節，在當地大玩特玩：「諗住減肥過去食意大利粉，有時間仲打算去埋羅馬行吓！」

電影中不少武打場面，大聖劈掛高手秋生，這次要轉打詠春，他表示非常有難度：「大聖劈掛要大開大合，詠春要很小很窄。（出招唔出聲？）一啲啲門派啦！不過戲入面為咗要保持葉問有大師風範，所以都唔發聲。」由2008年開始，「葉問」電影已經拍過無數次，而葉問一角更曾有多位藝人演過，Angela問秋生接拍時有否猶豫過？他說：「有呀！我拍電影都過百年啦，所以都諗有咩可以拍呢！」秋生問非所答，令Angela哭笑不得，即轉問邱禮濤有否猶豫？他說：「我只係有思考過。（諗啲咩？）諗吓我應該拍啲咩！」導演又向Angela大爆秋生無時無刻在鏡頭前後都保持葉問味道。

「是非惹我」

此外，去年秋生在微博發表「而我不知道羅志祥是誰」而遭對方粉絲圍插，突然之間是非好像直衝埋身，問到感受如何？他說：「我不嬲都唔惹是非，一向都係是非惹我，再講我唔會為咗任何人而去改變！」想知道秋生對羅志祥事件更多看法？想知道導演邱禮濤拍電影的趣事？請即Click入《娛樂onShow》睇啦！