樂瞳李天翔唔過電

「宅男女神」樂瞳最近擺脫港女角色，在新劇扮演粗枝大葉女生，但她不經意將粗魯因子帶回現實，令導演也禁不住叫她：「斯文點！」提到出道以來緋聞不絕，她深表無奈，又澄清與李天翔只是普通同事，連兄弟也稱不上。

無綫小花樂瞳之前在時裝劇中大多扮演貪靚的港女角色，但她最近在兩套古裝劇《初五啟市錄》和《師父‧明白了》都扮演粗枝大葉的女生，實是一大轉變！雖然樂瞳自言擁有男仔頭性格，但拍過這兩套劇後，粗魯指數可謂十級跳：「我拍完呢兩套劇之後，我都變得粗魯咗！本身自己都只係有少少Man同男仔頭，不過當我拍完《師》劇影海報時，我竟然坐喺Studio擘大咗隻腳，跟住都畀導演話：『樂瞳，你斯文啲啦！』跟住我話：『唔好意思，我習慣咗！』突然間發現自己仲未抽離到角色！所以拍完劇後，我都要變番斯文啲，我唔想搵唔到男朋友！」

唱歌演戲互惠互利

樂瞳雖然現時是單身，但出道至今緋聞不絕，如朱敏瀚、楊潮凱等，對此她也深表無奈：「唔通男同女之間唔可以有純友誼咩？同埋我通常都一大班人出街，從來都唔會單獨同男仔一齊，所以我覺得好無辜同無奈，好似畀人寫到我好水性楊花咁，但我同佢哋都係兄弟！」

而談到早前跟李天翔傳緋聞，樂瞳更沒好氣地說：「天翔更加未到兄弟嘅地步，只係普通同事，當時只係因為要宣傳同佢喺《初》劇中嘅感情線，所以先同佢影幾張合照放上微博。」

以歌手身份入行的樂瞳，現時儼如成為電視圈的一分子。對於唱歌與演戲的平衡，樂瞳說：「我唔想由兩者去取捨，反而覺得可以互惠互利！因為電視劇可以幫到更多人去識我，而唱歌亦係我本身嘅興趣，所以我好希望觀眾除咗睇我做戲外，仲會聽埋我唱歌，所以我希望好似鍾嘉欣咁，唱歌同拍劇都一樣咁成功！」