樊少皇難忘拮住談情

動作演員樊少皇昨日率領陳嘉桓（Rose）、王君馨（Grace）及陳國坤（小龍）等，出席於灣仔會展舉行的《功夫打出一片天論壇》。活動上播放由楊盼盼執導的五部電影預告片，「處女」Grace於電影《軍閥年代》中被日軍強姦及半裸，飾演其初戀情人的樊少皇則與她在草上談情，他說：「因為入夜要趕戲，當時草地又拮又有蟲，但我哋要扮到好浪漫、好舒服，嗰場戲真係好難忘。（有親熱戲？）最親熱都係拖吓手，挨來挨去。」又笑言試過被反應彈炸中，故拍攝時着工作人員小心，嚇親首次拍功夫片的Grace。談到導演葉永健三日冇沖涼，Rose說：「我試過兩日冇拆頭、冇洗頭，因為佢哋話我太瘦，所以Set到成個外星頭咁，鏡頭入面先會闊啲，個頭要Set兩個鐘，瞓覺都要打側，醒咗就化完妝就去拍戲。」