鄭希怡與未婚夫吵大鑊

鄭希怡（Yumiko）早前宣布年底與化妝師男友Andy結婚，正籌備婚事的她最近情緒大為波動，日前和Andy當街鬧意見搞到面左左，「婚前抑鬱」的她其後更找姊妹團飲酒訴苦，直認最近極為忟憎，不時和未婚夫吵大鑊。

鄭希怡（Yumiko）去年於布吉意外受傷，拍拖8年的化妝師男友Andy（梁學儲）對她照顧有加，兩人共度患難，決定拉埋天窗，原本有意將婚期定於上月，順便慶祝拍拖8周年，奈何最終籌備不及，婚期要押後至11月。

坦承易憎

Yumiko對婚禮相當重視，有意先在上海老家擺酒，再於香港設宴逾30席招呼圈中好友，而她想婚禮盡善盡美，婚紗和晚裝更絕對不能馬虎，難免和未婚夫鬧意見。日前晚上7時許，Yumiko與Andy於跑馬地一間食店醫肚，綁上頭巾的Yumiko和Andy不停密斟，未幾卻發現她開始面燶燶，看似意見不合，其後兩人匆匆埋單離開。步出餐廳後繼續面左左，Yumiko自顧自傾電話，在旁的Andy懶理她一袋二袋，未有上前幫手之餘還自己先上車，難怪Yumiko嬲到嘴扁扁。

與未婚夫吵大鑊後，Yumiko約好姊妹黃伊汶等到灣仔飲酒訴苦，苦口苦面的她經大家開解一晚後才展露笑容，逗留兩個小時才離開。其後記者聯絡Yumiko，問到和未婚夫嗌交，她說：「我哋係有嗌交，最近自己易忟憎，其實我哋之前好少嘈交嘅，呢排有啲嘢。（為咩事嘈交？）都係酒席啦！本來諗住搞掂香港嘅酒席，就可以專心搞上海酒席，點知依家兩邊都未搞掂。（揀咁耐？）因為香港方面一直都想揀戶外場地，但又驚到時落雨，所以選擇唔多。（Andy冇幫手？）佢好忙，冇咩時間，香港打算擺三十幾圍，依家唯一做咗嘅，就係編好晒朋友嘅座位。」