學友Hurt得人多驚報應

近日香港頻頻發生倫常慘案，令一眾星級父母都大呼關注！身為廿四孝爹哋的張學友亦表示要找個機會，向兩個寶貝女灌輸正確觀念，又大嘆為人父母甚艱難，皆因日夜擔心女兒會受傷害，笑言：「報應嚟！」

歌神張學友與組合Mr.主音Alan昨日錄影now節目，提到近日香港發生的逆子弒父母慘案，育有兩女的學友非常關注，表示要在適當時候向女兒解釋：「依家唔係好敢講畀兩個女聽，搵個適當機會，要自己沉澱吓先，分析清楚先講，費事講錯就唔好。」

由於大女已12歲，問到可有向女兒灌輸性教育？學友說：「都有講！（同老婆一齊講？）佢有佢講，我有我講，我負責分析男仔心態。（擔心？）我覺得已經冇得擔心，最緊要教佢哋點去保護自己，同埋講佢哋知發生事之後嘅後果。」他慨嘆為人父母壓力大，時刻擔驚受怕女兒會受到傷害，更笑言「現眼報」：「其實最驚女兒受到傷害！（你以前傷害過人？）報應囉！報應嚟......報應嚟嘅！（咁傷害過幾多個？）幾多個都係報應囉！」

嚴父轉型做朋友

談到父女相處之道，曾是嚴父的學友透露正在「轉型」：「我對個大女係嚴啲，但依家慢慢轉型做好朋友，不過要埋身好困難。」由於兩名女兒都是讀國際學校，他直言反叛期會提早，更化身「問題」少女，愛問甚麼和經常說：「It's Not Fair！」問到將來女兒拍拖會否變成「呷醋爸爸」？學友說：「至少要畀我睇咩樣，睇唔到會亂諗嘢，為人父母真係好大壓力！」

另外，學友早前義務拍攝電影，演一個借種生子的角色，問到有否打算再追一個仔？他笑說：「唔係啩？你講笑啫？（去外國做人工受孕？）我依家冇擔心要人工受孕，冇諗過追啦！唔同階段做唔同嘅嘢，唔好淨係諗生仔。」