任達華牛一抱「小樹熊」

與Mandy Lieu同樣慶祝生日的任達華前日58歲生日，與名模太太琦琦、愛女晴佳及外母一家四口歎西餐慶祝！前晚華哥和琦琦先拍拖到中環，其後到商場外接女兒，他一見女兒即拍手掌，晴佳從車內飛撲到華哥懷裏，更化身小樹熊箍實爹哋，華哥非常受落，全程又攬又拖着女兒步行到餐廳，而琦琦似備受冷落，與媽咪緊隨其後。

華哥見記者即禮貌打招呼，記者讚他狀態Fit爆，他笑說：「個女話我今年27歲『Dad you are 27！』（囡囡同太太送咩畀你？）個女畫咗張卡畀我，尋晚半夜畀我，畫滿晒公仔，好童真，好Sweet，甜到我都瞓唔着。老婆就送咗個旅行畀我，遲啲一家人去歐洲玩，順道睇埋場英超，好多謝老婆！（生日願望？）身體健康！」問到琦琦被老公冷落，她笑說不會介意，指他們父女感情好Sweet，又稱華哥拍戲忙少見女兒，想陪女兒多一點好正常。此外，琦琦在微博祝老公生日快樂，又放上晴佳畫給華哥的生日卡，寫着希望父親攞更多電影獎項！