城城騷前冧吊臂加保險

「舞台王者」郭富城昨晚為一連9場紅館個唱揭開序幕，不過騷前發生意外，一座大型吊臂於綵排中傾側，目睹意外經過的城城昨晚急急取消出事環節，更加重保險！但意外無損城城的心情，他繼續化身「蜘蛛俠」擒上高台大跳高難度舞步，更High爆玩激凸！

郭富城《舞臨盛宴世界巡迴演唱會2013香港站安哥篇》昨晚在紅館開鑼，最近日以繼夜綵排的城城為個唱加入新元素，包括變形火影金鋼舞台等，當中更有兩台超大型道具，價值至少500萬元！不過，昨晨有網友爆料，指城城綵排至凌晨時分發生意外！網友指有工作人員表示，當城城乘吊臂車升至約3米高時，吊臂突然橫倒於觀眾席上，幸好城城沒有受傷，而昨晚的演出已取消出事環節。

熊黛林祝願順利

城城昨日為個唱拜神時未有提及綵排意外，期間更風騷高舉拇指，心情明顯未受影響！昨晚9時許，城城以淺藍色緊身透視戰衣為個唱揭開序幕，並以勁歌熱舞炒熱全場氣氛，其後他換上黑白緊身歌衫，變身「蜘蛛俠」擒上高台大玩高難度動作，期間更High爆激凸，盡顯「舞台王者」風範！

對於愛郎傳於綵排時出意外，事先張揚會捧場的熊黛林（Lynn）表示未有所聞，但仍送上祝福：「願演唱會成功，順利！Thank you！」而城城的經理人小美則澄清意外發生時，城城並不在吊臂車上：「其實上年都有（吊臂），但今次改咗新嘢，唔係上年嘅『太空蛋』。嗰時吊臂失去平衡傾側，係個躉磅數唔夠，所以唔夠力，好彩工程人員冇事，當時吊臂上面冇人，城城喺台睇住個吊臂傾斜！」為安全計，昨晚的個唱取消出事環節，小美說：「之前肥佬導演上去都冇事，依家會調一調。（嚇親？）有，係擔心嗰種。」她揚言已為城城加重保險，不擔心意外會影響其心情，並指城城雖然通宵綵排，但不會精神不足：「佢太鍾意舞台，最精神係佢，佢排到今朝6點，下午4點又嚟排過，不過今次個騷係比較複雜！」