葉熙褀誤中圈套 悔戀房祖名 靠工作療傷

擁有天使面孔及42吋長腿的內地歌手葉熙祺，甫出道已冧死宅男，去年因與成龍兒子房祖名鬧出感情瓜葛而為人熟悉，卻受盡冷言冷語，難怪她慨嘆感情一敗塗地！表面看來，她是情場輸家，不過卻忠於自己，繼續尋找簡單的愛情。

何謂男士心目中的美女？撇開豐滿上圍及42吋長腿，眼大大、面尖尖及標致面孔，就是這個年代的審美準則，只要符合以上條件，便不乏裙下之臣。25歲的內地歌手葉熙祺是其中一位，憑一副靚樣成為宅男女神，成功開拓吸金路！

葉熙祺說：「唔覺得自己靚女，畀自己80分啦！唔算係女神，好多人會問我有冇整容，我好肯定答你冇！我好抗拒整容，唔係怕痛，只係呢啲嘢危險，可能會出事，唔想人哋只係留意我個樣，唱歌同演戲我都花咗努力，想畀人睇到我嘅成績，好似做戲，之前拍電影《天生愛情狂》同《詭愛》，落咗唔少工夫，希望演技得到肯定！」

工作開始上軌道，葉熙祺去年隨即爆出與房祖名的緋聞，去年10月又傳二人閃婚，雖然遭否認，但男方暗指有人放料，矛頭直指女方，事件鬧到滿城風雨，究竟兩人關係如何？

癡心錯付

葉熙祺說︰「呢個係我人生最失敗嘅事，感情上未試過咁一敗塗地，呢啲回憶我當然想忘記，想當咩事都冇發生過，我係信錯人，大家深入了解後，已經睇清楚，覺得之前了解唔夠，我做嘅事對得起自己，依家係有後悔同佢一齊，當然唔單只係呢件事，有好多原因去後悔，自己係娛樂圈嘅BB，好多嘢唔識，好易行錯或者中圈套。」問到有否和祖名聯絡？她說：「不如你問番佢啦！得我講未必有用，呢種情況下唔出名嗰方好蝕底，會畀人誤會或者對你有偏見，正正就係我當初入行唔明嘅事，依家深深感受到。我唔係好贊同博出位，唔會係一啲用自己手機偷影，再扮唔見手機嚟造新聞嘅人，因為會影響人哋形象，如果有人覺得我係咁，請攞證據出嚟，我冇做過，問心無愧！」

天真惹禍

愛情無分對與錯，每次都是上一課，經歷多了人也會長大，從前堅信愛情可以好簡單的葉熙祺，不禁慨嘆天真無邪，雖然被傷得徹底，但她每次亮相都會掛起迷人笑容，強裝堅強：「其實我算係敢愛敢恨，亦經常以為愛情係可以好簡單，以前都畀人話我好天真，但依家開始對一種天真冇猜忌嘅愛情有懷疑，我會帶眼識人，要時間去睇清咗先會行出第一步。對男人係有少少失去信心，但我唔係一個畀人覺得自己弱嘅人，想畀多啲陽光大家，經常掛起笑臉，所以會收埋自己，呢件事上反而覺得要多謝好多人，身邊朋友冇覺得我唔啱，當然外界唔少聲音都係話我。」

葉熙祺與祖名劃清界線，事隔大半年有多，祖名已有新戀情，而今次的女主角更是祖名舊愛薛凱琪，二人早前被《好報》踢爆翻撻，男方充當「柴可夫」載女友回家。看到祖名有新戀情，曾受「傷害」理應酸溜溜，但葉熙祺卻說︰「我都有留意報道，當然會送上祝福，佢咁長情同多情，係多人愛嘅。」言下之意是褒是貶，真是只有天知、地知和她本人才知道呢！

努力搵銀

有人說用工作療情傷，排得密密去麻醉自己，當未有時間去想，傷痛就會慢慢流逝。葉熙祺忠於這套愛情療傷大法，往後的日子已作出打算，就是要專心工作，希望事業闖出一片天：「事情要過去嘅，我唔會再留戀，近期離不開呢啲話題，冇錯可能多咗人認識我，但我冇特別去諗，唔想用呢啲換取工作，愛情對我嚟講，唔會係生活中一定要有嘅嘢，依家做番自己都幾好吖！我熱愛工作，冇嘢做反而覺得唔習慣，所以之後當然係繼續工作搵錢啦！最緊要養得起自己同屋企人，電影拍完，最想係再投入唱片方面，之後會去日本發展行騷，呢啲都係我鍾意做，我覺得只要有工作都可以好開心。」

後記：信不信由你

有人對風水非常迷信，凡事都要算過才安心，可能你會覺得沒有科學根據，但身為潮州人的葉熙祺自言家族相當迷信，故她亦去算一算姻緣，她說︰「個師傅好厲害，好多名人都搵過佢算命，19歲時我算過，佢話我30歲後結婚會好富有，如果30歲前反而失去唔少嘢，初時唔係太信，依家我就覺得幾準！」哪即是說她拍拖時已諗定結婚了嗎？