Crystal台上台下「兩個樣」

HotCha成員張紋嘉（Crystal）與創作人徐羨曾（阿徐）合演舞台劇《勁金歌曲2誰比你重要》。二人日前綵排時互爆瘀事，Crystal說：「阿徐好大汗！每次演出佢都會成身濕晒，啲汗滴晒落地下，搞到我要忍笑！」阿徐立即反擊：「Crystal喺台上好有自信，但佢平時份人好緊張、好驚青！有次綵排我專登爆肚，即刻嚇到佢口窒窒！」

兩人表面「互窒」，其實非常老友，Crystal說：「我舞台經驗未算非常豐富，好多謝阿徐呢位前輩經常教導我！今次《勁》劇啲飛一開售就賣晒，依家仲可以喺三月廿九日加開一場，真係好開心！」她在劇中將飾演張國榮（哥哥）的瘋狂忠實粉絲，她說：「未試過追星，但讀中學時就試過為男友追星，佢好鍾意Twins，我當時就陪佢睇晒所有Twins嘅演唱會！」