莊思敏彈港男太奀

模特兒莊思敏（Jacquelin）早前艷福無邊，有幸與三位來港開「爆衫騷」的外籍肌肉男見面。她明顯勁冧其中一位成員Bryan，不但大讚對方大隻又靚仔，言行大膽的她更彈一班港男太過「奀」，冇得比！

閱仔無數的莊思敏有幸先睹為快，率先與三位來港為爆衫騷做準備的外國肌肉男Bryan Chan、Dave Abrame及Billy Jeffrey見面。甫見面，眾人已雞啄唔斷！三位猛男更大騷Quali震胸肌，令Jacquelin忍不住要出手摸他們的胸肌！事後，她對三位猛男讚不絕口︰「因為上一次佢哋嚟香港表演嗰陣，我要做嘢Miss咗，朋友睇完都話正，所以今年我要Mark定期去睇！第一次咁近距離見到呢幾個肌肉形嘅男士，覺得好得意！」

Jacquelin表示Bryan最合眼緣︰「傾得最多偈係Bryan，咁佢都幾靚仔，哈哈！佢個樣容易啲吸引我，而且佢唔係最大隻嗰個，所以冇咁驚！另一個好大隻，但我覺得佢大隻得濟！」問到是否相當吸引？她說︰「咁大隻係吸引啲，但太大隻就會驚。女仔都幾矛盾，有時問身邊啲Friend，佢哋都想男友大隻啲，冇肚腩，但練到好大隻嗰陣，佢哋又會驚男友畀其他人睇中，或者騷畀其他女仔睇，會擔心畀人搶咗！」

擇偶唔睇表面

她透露擇偶條件並不在於表面︰「冇乜所謂，高矮肥瘦唔係最大問題，嗰啲只係外觀，最緊要係健康！」但她其後又大彈港男「奀」︰「香港男仔太奀，成日聽到佢哋講減肥，話要減咗個肚腩，而唔係話去練腹肌，所以喺街上面睇到嘅男仔都係瘦，但係奀嗰隻囉！」