阿澤秋生唇槍舌劍 冤家險碰頭

藝人杜汶澤（阿澤）到場時，談到電影《低俗喜劇》被批評而引發中港矛盾，更被黃秋生狠評他整Cheap港人，阿澤昨晚說：「我冇回應、冇意見、冇諗法。」早前秋生與台灣歌手羅志祥隔空罵戰，問到是否懶得跟對方鬥長氣？阿澤寸爆說：「連羅志祥都唔識，有乜好回應！」未幾秋生亦到場，問可知與阿澤同場？他說：「點知！我又唔係同佢一齊住，你去問田蕊妮啦！（佢嬲喎！）點會咁小器，佢人緣咁好，講完又講，使唔使我拎本英漢字典解釋？（見到會尷尬？）點會？我又唔係偷佢嘢！」對於被阿澤窒唔識羅志祥，秋生即向入圍金像獎「最佳男主角」的阿澤反擊：「今年我頒『最佳男主角』，原先Set好台詞，但依家要再度下。（落重藥？）梗係，一年一度嘛！（睇好佢攞獎？）我睇好佢有份，希望四個都有獎。」不過今屆共有五位演員競逐影帝。