楊焉「熟」女愛回家

不少模出完寫真再拍戲都可以撈到風生水起，賺了不少，但擁有E Cup導彈身材的楊焉（前名︰楊梓瑤，Carol）卻無故放棄大好「錢」途。「潛水」一年的她再蒲頭，轉變的不是樣貌，不是身材，而是思想。花了一年光陰，因為家人她變得成熟︰「我唔可以再咁任性！」

要數圈中有「Cup」數的80後模特兒，除了神級的性感女神周秀娜、「警鐘胸」Jessica C.、陳靜及何佩瑜幾位外，還有一個楊焉！現年24歲的她於2010年挾「浸大E神」之名踩入寫真戰，推出噴血寫真集，憑高聳入雲的山「峰」迷死大班宅男，及後更踩入影圈拍戲，本來有大好「錢」途，但她去年卻選擇封胸兼離港讀書，放棄娛樂圈。「消失」一年後她再蒲頭，當年在寫真戰的對手不少已略有成績，相反她要由零開始，但她並不後悔︰「有好多人都覺得我浪費咗時間，認為我之前條路好順，出書又拍咗5部戲，但我冇後悔當時做咁嘅決定！」

情緒崩潰．遠走

一個女生才20出頭，難免比較任性，完成學業後，Carol心裏浮現一句「想離開香港」，便不顧一切放下眼前的一切，離開娛樂圈，獨自到北京，她說︰「拍完《猛鬼愛情故事》，其實我已經好想離開香港，覺得有啲嘢已經用盡，加上學業行先，我當時唔係好Care喺呢一行啲成績，只係做Part-time，而且當時成日大病，想畀自己冷靜期。」因為壓力和病魔纏身，Carol充滿負能量，變得非常迷惘︰「啱啱畢業情緒好低落，唔知可唔可以叫做病，總之好唔開心啦！自己會喺度喊，好在未去諗做傻事，但呢啲事朋友幫唔到我，我又唔可以畀屋企人知，唔想佢哋擔心，所以就決定自己一個離開，當時甚至諗過唔再做呢行！」

人也許要有經歷才會學懂長大，Carol獨自在北京生活了一年，當地沒有多少人聽過「浸大E神」這個「朵」，她可以過着樸素生活，日子一天一天的過，她漸漸開竅！除了學會不能逃避外，眼見雙親日見蒼老，她深深體會到親情的重要，Carol說︰「喺北京嗰陣，其實每個月都會返嚟一次，不過留得唔耐，甚至夜晚會出街見吓好耐冇見嘅朋友，見父母嘅時間少之有少，記得上年11月返嚟行畢業禮嗰陣，父母都有嚟觀禮，可能同佢哋太耐冇見，先發覺佢哋老咗好多。」

患癌驚魂．歸途

剛巧當時霆鋒於無綫節目中驚爆因發現頭上有黑斑，驗出患有初期皮膚癌，而Carol亦於畢業禮上發現父親頭度有黑斑，令她非常擔心︰「當時我見到嚇咗一嚇，心諗死啦，好擔心爹哋有皮膚癌，所以即刻帶咗父母去做身體檢查！」說時一臉神傷的她更哽咽說︰「雖然唔係Cancer，但嗰時先發現原來父母有好多病痛，我好似之前冇乜盡過做仔女嘅責任，所以我覺得自己唔應該再咁任性，決定返香港，要變得大個女！」

變得成熟的Carol決意展開人生新一頁，機會亦隨之來臨，當時身在北京的她經介紹下與現任老闆陳百祥（阿叻）會面，更一拍即合加盟對方公司，正式回歸娛樂圈，她說︰「咁啱當時叻哥同校長（譚詠麟）去北京做嘢，而我又識得佢公司嘅經理人，經介紹下大家食咗餐飯，傾咗好多工作嘅嘢，而且我想做個成功演員，大家一拍即合！到我返香港再見面，之後加入佢哋公司，不過我同模特兒公司仲有約，所以我都會兼顧模特兒工作。」

「京」鴻一瞥

單身的Carol獨自在北京一年，理應認識不少當地型男，她卻慨嘆臨別北京才遇上︰「其實真係冇乜去識，只係臨離開北京前一日，朋友先介紹咗個男仔畀我識，佢係內地演員，都幾老實同踏實。」但是否她的那杯茶？她說︰「嗯……遇到時就會遇到啦，臨走先識，可能係有緣無分。」其實現今科技先進，即使分隔兩地也可以聯繫培養感情！