Bobby飯局檸茶代酒

歐陽震華（Bobby）為慶祝早前入院大步檻過，前晚相約林峯及阮兆祥等好友開餐，期間他遵守承諾，以檸檬茶代酒，更風騷地說：「（健康）好過以前！」

早前歐陽震華（Bobby）因急性肺炎入院，更一度被送入ICU搶救，幸而最終大步檻過，他於兩星期前出院，前晚就相約好友在銅鑼灣食中菜慶祝。除了Bobby與老婆傅潔嫻外，林峯、阮兆祥及女友Crystal等亦有出席。眾人歡聚至晚上約11時半，身穿豹紋外套及豹紋波鞋的祥仔率先與女友步出，他面紅紅看似飲了酒，但笑容滿面，心情大靚，其女友則手持一袋外賣，似打包食剩的東西，不浪費食物，認真抵讚！

Bobby緊隨其後，與挽着他手臂的老婆步出。他雖未有醉態，當見到記者時，他即笑笑口揮手打招呼。問到健康如何？他風騷地說：「好過以前。」之後便與祥仔分別驅車離開。而Bobby昨日在微博中上載聚餐合照，場面熱鬧，席間Bobby更遵守減少飲酒的承諾，相中只見他飲檸檬茶，相信老婆大可安心。

陶大宇驚約開餐

另一邊廂，陶大宇得知老友Bobby回復健康即鬆一口氣，他受訪時說：「今次真係多謝Bobby！令我哋即刻醒覺，千祈唔好食嘢狼吞虎嚥。」他又笑言以後大魚大肉「擦餐勁」時，都不敢約Bobby。