薛凱琪力讚祖名好仔

房祖名與薛凱琪（Fiona）被《好報》踢爆「翻撻」，雙雙夜蒲兼「同車」，Fiona承認經常與祖名見面及食飯，大讚對方是好男仔，更以「我唔會答」保留發展的可能。

初出道時與祖名拍電影而傳緋聞的Fiona，近年因與方大同合作再鬧出緋聞，令三角關係錯綜複雜！雖然三人異口同聲否認戀情，但祖名與Fiona的「祖薛戀」常被撞破「拍拖」撐枱腳，昨日《好報》又獨家報道他倆孖住周杰倫夜蒲，祖名更做「柴可夫」送「女友」回家，有指兩人翻撻成功。

Fiona昨日透過電話受訪承認不時與祖名見面：「佢係好男仔，因為大家都忙，幾個月會見一次。」問到是否翻撻？Fiona嬌嗲地說：「都話唔係翻，都冇撻過。（佢帶你見佢啲朋友？）你知祖名啦，鍾意熱鬧成班人一齊玩。」

掌握行蹤

對「男友」行蹤瞭如指掌的Fiona不忘為對方宣傳：「知道佢最近接咗個朱古力廣告！」隨即又表示不介意被《好報》拍得同車，她說：「做藝人預咗畀人寫，寫祖名好過寫唔Friend嘅人。」問到有否發展可能？她不置可否說：「我唔會答！」似為戀情鋪定後路，而祖名至截稿前仍未有回覆。