楊思琦抱女手軟危危乎

慳家的單親媽媽楊思琦，為慶祝女兒楊卓穎（Krystal）一歲生日，日前罕有地大破慳囊，到金鐘一間五星級酒店慶祝，惟吳帥依然冇影。醫肚後，思琦抱住和吳帥勁似樣的「餅印女」步出，卻雞手鴨腳，不停換手抱女，搞到囡囡吊吊揈，結果要媽咪出手協助。

楊思琦於2011年6月突然宣布與拍拖9年的李泳豪分手，不久被指搭上前香港跳水隊成員吳帥並珠胎暗結，其後更避走美國養胎。去年3月8日思琦在微博宣布誕下女兒Krystal，但有指兩母女遭吳帥拋棄，頓變單親媽媽的她，要急急返港搵奶粉錢。

吳帥繼續冇影

轉眼間Krystal已經一歲，向來慳家的思琦，日前罕有地大破慳囊，與媽媽及多名親友往金鐘一間五星級酒店為女兒慶祝生日，不過囡囡爸爸依然未見影。晚上11時，戴住Cap帽、身穿紅色背心羽絨、一身師奶仔打扮的思琦，抱住跟吳帥勁似樣的「餅印女」步出門外等車，期間女友人不停逗Krystal玩，未知思琦是否臂力不夠，不停換手抱女，更雞手鴨腳地將女兒擺來擺去，搞到女兒吊吊揈，甚為驚險！

在旁的楊媽媽似乎睇唔過眼，隨即上前幫手抱住孫女，而酒店職員更為思琦推BB車，她安頓女兒上車後，親自駕駛七人車載屋企人離開。

狂搵奶粉錢

另外，思琦復出狂搵奶粉錢，但有傳監製不起用她拍劇，故她索性轉戰內地做騷，但為了養女和供樓，開支龐大的她決定大小通吃，最近連舞台劇也不放過，更於微博連環發功為舞台劇宣傳。不過，無綫非戲劇製作總監余詠珊則對她照顧有加，昨日余詠珊在電話中表示有新節目都會用她︰「我好鍾意佢o架！做單親媽媽一啲都唔容易，如果知佢冇工作在身，我有新節目都會好想用佢。其實嚟緊我都有新構思，人選仲度緊，開工賺錢養BB當然重要啦！思琦有工作寄託亦係好事。」