王梓軒避嫌老竇唔同場

歌手王梓軒昨日出席《中銀香港第56屆體育節開幕禮》，即將推出新歌的他被翻舊帳，被指擔任香港藝術發展局主席的父親王英偉涉用270萬元公帑捧他做「校園藝術大使」，以及派發其個唱門票。他澄清該大使身份是由學生投票選出：「主席係冇權選大使。（用公帑派個唱飛？）唔係真，因為用公帑要申請。（避做藝發局活動？）睇性質，藝發局同好多藝術團體Crossover，我做演藝行業都想幫手，但政治立場有尷尬，要確保爸爸唔出席。（唔再同場？）唔會啦，仲玩咩！」有委員炮轟涉利益衝突？他透露其父表示有反對聲音，並矢口否認公器私用。

同場的港姐冠軍張名雅被爆暗交無綫舞蹈藝員，她否認對方是男友：「華姐才藝表演搵佢排舞，想食番餐飯多謝佢，如果拍拖都唔會去銅鑼灣啦！（佢撩你大髀？）我着大褸Feel唔到，如果掂到我會縮！當時睇緊電話訊息，佢叫我過馬路。（對你有意思？）應該唔係。」