楊愛瑾走出迷陣等轉機

轉眼間28歲的楊愛瑾（Miki）入行已10個年頭，相比昔日舊戰友鄧麗欣及吳雨霏，其星途稍見遜色，她承認年少時「唔識諗」累事。但經歷十年風雨，她自言長大了，現重新開始尋找新轉機。情路上Miki與永安太子爺郭永淳的戀情依舊低調，對於踏入適婚之齡，她說︰「我依家未想結婚！」

事業篇

十年前女子組合Cookies出道，九位成員個個青春無限卜卜脆，《心急上人》成為不少年輕人耳熟能詳的歌曲，「九餅」之後拆夥，幸運的是楊愛瑾跟鄧麗欣（Stephy）、傅穎（Theresa）和吳雨霏（Kary）有得留低被力捧，前途一片光明。十年後，四人各散東西，Stephy主攻內地勁吸人仔，Kary成為環球「一姐」兼開個唱，Theresa出書做才女，最近更攻入台灣市場，三位各有自己的一片天，至於28歲的Miki？去年底她才重新出發簽約新公司，做電視劇新丁兼在影圈發展。對於事業稍為遜色，她說︰「見到佢哋成功我會開心，我唔會因為咁而氣餒，因為佢哋起步快過我，而且識諗過我，好早就搵到佢哋喺呢行嘅目標。」

溫室長大欠主見

言下之意，Miki是「冇主見」。原因很簡單，就是她自小被父母過分呵護，甚少遇到風浪，有人會覺得這是很幸福，但她慨嘆這令她在娛樂圈迷惘了幾年︰「好似Kary行唱歌路線，Stephy更加係隊長姿態，其實佢哋好早已經有自己目標，可能係我細個喺幸福家庭長大，父母都好錫我，所以我個人係冇主見，呢樣又鍾意，嗰樣又鍾意，根本冇諗自己其實鍾意啲咩，更何況喺呢行？不過大咗就識諗，依家都會為自己嘅事業諗清諗楚。」

問到會否羨慕Stephy等人？她直言經歷多了，人已變得豁達︰「佢哋當然做得比我好，但我唔會同佢哋有隔膜，唔會眼紅佢哋同不和，其實呢行係講際遇，可能我嘅機會未嚟到呢！當然嚟到都要把握，用我最大能力去做，有幾多收穫估唔到，又或者咁講，你做一套戲或者唱歌，拎唔拎到獎冇人知。」

轉公司想拍代表作

入行第十個年頭，Miki選擇轉投新公司，決意重新開始，她不諱言想拍出代表作，才有這樣的決定︰「其實呢間電影公司嘅老闆識咗好多年，要數到去金牌年代時認識，以前佢係導演，合作過一套戲，之後都有保持聯絡。佢之後知我想拍戲，咁啱佢搞電影公司，大家就一拍即合。（係咪因舊公司冇機會？）唔可以咁講，佢哋係經理人公司，做嘢性質唔同，只可以話依家係專業啲。」

愛情篇

愛情上Miki昔日戰友也能開花結果，Stephy與方力申恩愛非常，Kary近日更被踢爆撻着余文樂及蜜遊歐洲，Miki也情歸永安百貨太子爺郭永淳，提到感情事，她起初顯得煞有介事，其後笑說︰「盡量低調啦！咁大個女冇理由唔拍拖嘅。」她一如以往，對感情事收得很埋︰「就算同邊個拍拖，有冇拍拖，明白好多人對我哋啲生活比較好奇，但有時講得太多私人感情或者屋企嘅嘢，會將你做嘅嘢蓋過，可能你講一句呢啲感情嘢，就蓋過你做20樣嘢，所以我想專注做嘢多啲，尤其係講咗咁耐呢！」

但Miki承諾時機一到便會大方公開︰「如果去到一個係可以畀大家知，又或者去到一個位先算囉，好多嘢話唔埋，隨緣啦！」她口中的那個「時機」，究竟是何時？會否結婚才公布？她未有回答。從其字裏行間，Miki甚至對結婚未有太多感覺︰「每個女仔都要，但只係睇吓幾時，依家未想結婚，未肯結婚！」其後她停一停又說︰「但我一定會結婚！當然每個女仔圍埋都會講拍拖結婚，但有時係諗吓，其實隨緣，唔會Plan，我唔係家庭主義好重嘅人，我係想工作上做到我要做嘅嘢，其他嘢再算。」