洪卓立牛一慘食檸檬

歌手洪卓立今日26歲生日，他昨日與師弟羅力威出席將於月底舉行的演唱會記者會，但對方竟請他食檸檬，不願吻賀他，只以「擁抱」代「吻」，攬着他補數！

洪卓立（Ken）與羅力威（Adason）昨日出席將於本月31日舉行的《雙子情繫大提琴演唱會》記者會，各吸引逾百歌迷撐場。席上，大會送上蛋糕為今日26歲生日的Ken慶祝，當記者要求Adason送「香吻」給壽星仔時，怕醜的他不斷「耍太極」，結果請Ken「食檸檬」，令對方非常尷尬！Adason為打圓場，主動攬實對方補數，他說：「男仔唔會錫，加上佢咁多歌迷喺度，怕歌迷呷醋！」

問到Ken有否獲緋聞女友湯怡邀請拍拖撐枱腳？他說：「今晚我要開工，應該係同公司同事一班人食飯！（湯怡都去？）會。」他透露緋聞女友因拍劇而病倒：「希望佢身體健康，唔好傳染我。」記者問他是否自爆同居？他立即面紅紅說：「唔係，怕食飯傳染我。」

羨慕林峯帶BB旅行

問到兩人會否邀請另一半睇騷？Adason表示要視乎公司是否有門票給他，才敢邀請緋聞女友雨僑捧場。而Ken則說：「最想屋企人嚟睇，因為佢哋好少聽我唱歌。」對於林峯與女友吳千語20日去三次旅行，兩人十分羨慕，但現時希望努力賺錢，並異口同聲表示未試過與另一半出國旅行。