阿澤爆風流史整喊田蕊妮

杜汶澤一連三場《咔啦騷》前晚在會展圓滿結束，獲太太田蕊妮及圈中好友彭浩翔等捧場。薛凱琪被吊高出場後，笑言到韓國隆胸，被阿澤寸爆：「你頸長膊頭窄，波大好怪，邊得嚟咁大個胸圍？如果你大波，房祖名就一早吼你啦！」他更大講風流史兼感激老婆支持，令田蕊妮哭成淚人！完場後，田蕊妮坦言不知阿澤會自爆風流史：「佢喺屋企讀劇本冇讀出聲，劇本仲放喺枕頭底！」至於阿澤7月將會於澳門開騷，若反應熱烈，更會闖歐美演出。