張名雅驚喜泳裝唔嫌多

出爐華姐昨日到東莞領獎，季軍張名雅表示為求驚喜，才會於自選服飾環節穿泳裝，而師姐苟芸慧認為泳裝唔怕多，更大讚張名雅身材好！

新鮮出爐的國際中華小姐冠、亞、季軍得主鄧佩儀、陳楚寰及張名雅，以及友誼小姐周慧倫和明日之星大獎得主宋沁褘，昨日到東莞出席金至尊珠寶頒獎活動，接受權杖及后冠頒贈。師姐苟芸慧及張嘉兒亦有同行，苟姑娘晒事業線搶鏡，吸引近百名巿民圍觀！

對於前晚節目被批評求其兼簡單，連表演嘉賓亦欠奉，苟姑娘坦言焦點應放在不同環節，又大讚今年節目有不少新鮮感。提到張名雅多次着泳衣，大有賣弄性感之意，她說：「佢身材好好，好多人鍾意睇泳裝，選美梗係睇靚嘢，觀眾唔會介意太多。當年我着得仲多（泳裝），仲要着住跳舞添！（前晚你都好性感！）設計師設計出嚟，我要配合着出特質，都好高貴。」張嘉兒坦言最愛看泳裝環節。而張名雅否認僅奪季軍而不快，只是宣布得獎那一刻反應不及。提到前晚在胸部做「手腳」，她說：「其實係配合件衫，效果好好，朋友都有讚，仲轉載啲新聞畀我睇，都係健康性感。（被批評着得太多次泳衣？）自己揀嗰件泳衣，係想帶出驚喜。」

出爐冠軍恨做主持

至於冠軍鄧佩儀表示前晚開心得睡不着，又坦言未決定是否留港發展，現就讀大學三年級的她喜歡香港，亦對演藝及主持工作感興趣，她聽聞馬浚偉樂於教人，故希望與對方合作。提到佳麗穿泳衣示人的鏡頭太多，她指於溫哥華更要穿泳衣做動作。至於表演嘉賓欠奉，她說：「有會更加好，但我哋跳舞都好精彩！」而亞軍陳楚寰指宣布賽果時大感驚訝，又指為跳舞環節下了不少苦功。

此外，通訊事務管理局接獲華姐5宗投訴，指賽果不公、司儀用語粗俗及將來自中東的肚皮舞稱來自印度，有誤導成分。而上周首播的無綫劇《心路GPS》亦收到共10宗投訴，包括醜化90後年輕人。