趙哲妤食腦「妝甲師」
前中國小姐趙哲妤可謂精通十八般武藝，超級貪靚的她最叻化妝及美甲，更投資開店做老闆娘，落手落腳入貨兼搞設計，向大家傳授DIY Gel甲技巧及速變夜蒲眼妝，對她來說簡直是Easy Job！
曾開時裝店的趙哲妤（Uny），半年前跟友人投資六位數在上環開美甲店，對店內所有事都親力親為，上至入貨、宣傳及人力資源，下至店內設計都瓣瓣掂，Uny說：「之前有人Sponsor（贊助）我美甲兩年，一直都有向佢偷師，慢慢我就愛上咗整Gel甲，後來個老闆娘大肚，所以我就頂咗間舖嚟做。讀大學嗰陣因為學過剪片同整圖嗰啲，所以啲宣傳單張同燈箱都係我自己設計。」
至於星級顧客唐貝詩、麥貝夷及岑潔儀等均不時前來捧場，頭半年已有盈利，生意不俗！Uny平日更會親自做Gel甲：「通常做完嘢已經好夜，師傅都走晒，所以我會幫自己整Gel甲，兩個禮拜就會轉款，因為我貪靚到爆燈，連媽咪都話我有自戀狂，中學時試過為咗冇全身鏡而同佢嗌大交，依家搬咗出嚟住，屋企仲有七塊鏡！」
出手拯救OL
至於化妝秘技，Uny透露細細個時便已接觸：「記得第一次化妝係13歲，偷用媽咪啲唇膏同眼影，中學就參加過課外活動嘅化妝班，大個之後又試過同私人化妝師學化妝一年，所以去飲都會幫媽咪同妹妹化妝，但其實我都係鍾意畀人化多啲。」她又表示鍾情於日本娃娃妝，更親自示範如何為OL迅速化上夜蒲眼妝，靚爆夜場！
愛扮靚的Uny將多年的心得化作搵錢工具，寓工作於娛樂！
貴為老闆娘的Uny事事親力親為，未知是否怕「力不到不為財」呢？
DIY閃甲
Step 1
先用打磨器大圈磨去指甲上的原有圖案，再用挫條在指甲邊左右磨出理想的甲形，若想嫵媚點可磨成圓形。
Step 2
用消毒藥水清潔指甲及用剪皮鉗箝去死皮，令Gel甲更持久。
Step 3
均勻地掃上底Gel，但切忌太貼邊，之後雙手照燈。
Step 4
2分鐘後，用較粗粒的挫條平放在指甲上打磨，以防指甲太光滑，令裝飾物黏得不實。
Step 5
將Color Gel平均地塗在甲上，並反覆地掃上兩至三層，再照3分鐘燈。
Step 6
貼上貼紙後，掃上透明Gel，再將掃黏滿閃粉及灑於甲上，記得將貼紙掃平。
Step 7
待指甲照乾後，再塗上Top Coat Gel保護指甲便完成。
變妝：OL速變蒲友
將淺色閃亮眼影塗在眼窩中間及眼頭，令眼珠顯得更大及更明亮，靚絕全場！
1. 先為眉上色，再用眼線膏於上眼線由中間畫到眼尾，再從中間拉到眼頭，記得眼頭畫尖點，可令眼睛更有神！
2. 用指腹將淺色眼影塗在眼窩打底，手指的溫度可讓眼影更貼服。
3. 深色眼影均勻地從眼頭掃到眼尾，漸變色令眼妝更多變化。
4. 用眼線膏於眼下方的中間到眼尾畫上半條內眼線，若畫上整條則顯得較惡。
5. 夾過眼睫毛後，將剪到適合眼睛長度的假眼睫毛塗上膠水，記得於前端加多點膠水，以防假眼睫毛彈起。
6. 貼於眼睫毛上，待30秒自然乾後，便可用眼線液補在假睫毛邊。若眼睫毛不夠翹可再掃上睫毛膏，同時令真假睫毛融為一體。
